Menu

Kunngimut nalunaarasuaat

02/09/2015 - 10:07

Godhavn Radio pisortatigoortumik atoqqaartinneqarpoq ukiut 90-t matuma siorna nalunaarasuaammik Kunngi Christiaamut nassitsinikkut, taamaasilluni TELE-POST septembarip 6-ani ukiunik 90-inngortorsiorluni nalliuttorsiussaaq.

1924-mi Grønlands Styrelse Kalaallit Nunaanni radioqarfinnik sisamanik pilersitsissalluni aalajangerpoq, tassa Qeqertarsuarmi, Nuummi, Tasiilami Qaqortumilu. Ukiullu tulliani Godhavn Radio siulliulluni atulerpoq.

Tassunga atatillugu Qallunaat Nunaanni nunap iluani pissutsinut ministeri C.N. Hauge Qeqertarsualiarpoq, septembarillu arfernanni 1925-mi radioqarfik pisortatigoortumik atoqqaartillugu Kunngimut ima nalunaarasuarpoq:

Ataqqinartorsuaq Qallunaat Nunaanni Kunngi København
Ullumi Godhavnimi nalunaarasuartaateqarfik atulersippara nalunaarasuaallu siulleq Kunngimut nassiunneqarpoq ataqqinnittumik qallunaat kalaallillu inuulluaqqusipput ajunngilagut
Hauge nunap iluani pissutsinut ministeri

Nalunaarasuaat umiarsuaq pujortulik S/S Oscar II Norgemi Bergenimiittoq aqqutigalugu nassiunneqarpoq. Nalunaarasuaammut akissut ullut sisamat qaangiummata Skagenimiit nassiussaq ima imaqarpoq:

Inuulluaqqussummut qujallunga ilissittaaq inuulluaqquassi Qallunaat Nunaata Kalaallillu Nunaata akornanni attaveqaatitaaq ingerlalluarnissamik kissaappara
Christian

Nalunaarasuaatit taakku nunatsinni oqarasuaateqarnikkut attaveqaqatigiinnermut aallarniutaapput. 1925-miillu ukiut 90-it ingerlanerini illoqarfiit nunaqarfiillu tamarmik radiokkut, nalunaarasuatitigut, allakkasuaatitigut, oqarasuaatitigut, TV-kut, mobilitigut, internertikkullu nunarsuup sinneranut attaveqalerput.

Tele-Postip ukiunik 90-inngortorsiornini malunnartillugu sulisuminut tallimanngorpat septembarip sisamaani kaffillerlunilu kaagillissaaq.

Ilanngullugit nassiuppavut nalunaarasuaatit marluk pineqartut assingi. Annertunerusumik paasisaqarusuttut ukioq 2000 saqqummersoq atuagaq ’Tele75 – Oqaluttuatsialaat – Krønike’ Per Dankerip saqqummersitaa atuarsinnaavaat. Attaveqaqateqarnermut pisortaq Ivalo Egede, oqar. 530706 imal. mail ivalo@telepost.gl -mut aamma paasiniaaffigineqarsinnaavoq.