Menu

MobilePay nunatsinni atorneqarsinnaalerpoq

19/08/2020 - 10:39

Akornutaasinnaasut tamarmik aaqqinneqarput, nunatsinnilu kikkulluunniit MobilePay atorsinnaalerpaat. MobilePay-mit atuisut tamarmik Danmarkimi nunatsinnilu akiliisinnaapput

Ullumimiit nunatsinni najugaqartut suliffeqarfiillu MobilePay atorsinnaalerpaat. MobilePay-imi periarfissat Danmark-imi atorneqarluartartut assigivai.

MobilePay app-iuvoq akeqanngitsoq, atuisunut sukkasuumik, ajornanngitsumillu MobilePay-imik atuisunut allanut aningaasanik nuutitseriaannaalluni periarfissiisoq naak konto normui allaqqaanngikkaluarlugit. Nunatsinni MobilePay atorneqalernera akiligassanik avissinissamut, soorlu neriniartarfinni, nuussinermi, katersisunut tapiinermi immaqaluunniit tuniniaasuni, kalaaliaqqami, pisiniarfinniluunniit akiliinermi oqilisaassaaq.

Nunatsinni MobilePay atulerniaraanni atuisup nunatsinni normuni qallunaat normuanik atassuseqqaassavaa. Tusass-imi atuisuugaanni tamanna Tusass.gl-imi akeqanngitsumik aaqqinneqarsinnaavoq. Taava MobilePay smartphone-innut aaneqassaaq, qallunaat normuanik atorluni atuisunngortoqassaaq, konto aningaasanik ikisiffissaq allattorneqassaaq, kort akiliut taavalu CPR-normu immaqaluunniit NemID ilanngullugu. Kortit MobilePay-imut atorneqarsinnaasut ukuupput VisaDankort, Dankort aamma Mastercard. Akiliut MobilePay-imut atorneqarsinnaanngilaq. MobilePay smartphones tamanut atorneqarsinnaavoq.

GrønlandsBANKEN aamma TELE-POST suleqatigiillutik ajornartorsiutigisaq, tassa qallunaat kalaallillu normui, sianerniaraanni aallarniutit, kisitsillu amerlassusai assigiinnginneri, aaqqippaat.

”MobilePay nunatsinni saqqummersinneqarnerani peqataanerput nuannaarutigaarput. Ilimagaaralu atorneqarnera siuaruartipallassasoq. Ajornanngitsumik, eqaatsimillu akiliisinnaanerit inuiaqatigiinnut iluaqutaassapput” GrønlandsBANKEN-imi aningaaserivimmi pisortaq Martin Kviesgaard oqarpoq.

Sukkasuumik akeqanngitsumillu qallunaat normuanik aaqqiineq

TELE-POST-imi pisortaaneq Kristian Reinert Davidsen-ip oqaatigaa, Tusass-imi atuisuulluni nunatsinniillu normoqarluni qallunaat normuanik atassusernissaa eqaallisarneqartoq.

”Nuannaarutigaarput pingaarutilimmik unammillernartoq aaqqiiffigeqataasinnaagatsigu, nunatsinnilu MobilePay-imik atuisunngorsinnaasunut periarfissillugit. Tusass.gl-imi aaqqiissuterput atoruminarpoq, akeqarnanilu. MobilePay-imi atuisut ullumimiit pilersinneqareersinnaapput,” Kristian Reinert Davidsen oqarpoq.

Danmark-imi nunatsinnilu akiliineq ajornannginneq

Nunatsinni atuisut iluaqutigisinnaavaat Danmark-imi MobilePay atorlugu aamma akiliisinnaagamik, Danmark-imilu najugaqartut MobilePay atorlugu nunatsinni akiliisinnaallutik.

”Kalaallit Nunaanni MobilePay saqqummerneqarnerani neriuutigaarput suliffeqarfiit atuisullu Danmark-imi Kalaallit Nunaannilu suleqatigiinnerat qanillinerussasoq. Naatsorsuutigaarpullu MobilePay atornera ulluinnarni oqilisaataassasoq, inuiaqatigiinnimi aggortitat atorneqarneri pisariaqartinneri annikilliartormat” MobilePay-imi pisortaaneq Claus Bunkenborg oqarpoq.

Attavissat

Peter Rex, attaveqarnermi nittarsaassinermilu siunnersorti, GrønlandsBANKEN, mobil (+299) 347872
Julie Rademacher, attaveqarnermi aqutsisoq, TELE-POST, mobil (+299) 263535

Peter Kjærgaard, Head of Press, MobilePay, mobil (+45)25424202