Menu

Mobilimik atuineq akikinnerusoq killeqanngitsorlu

06/12/2016 - 10:17

Tusass Plus nutaarluinnaq atorlugu sullitagut mobilillit Kalaallit Nunaanni oqaluussisinnaanngorput SMS-erlutillu killeqanngitsumik, taamaallaat qaammammut 199 kr.-neerlutik. Tusass Plusip angallattakkat atorlugit telefoneqarneq akikinnerulersippaa, isumannaannerulersillugu pisariinnerulersillugulu. 

- Tusass Plusip periarfissaasup nutaarluinnaap akigissaartullu ullumikkut saqqummiussinnaanera TELE-POST-imi nuannaarutigeqaarput. Ullutsinnut naleqquttumik mobilinut attartornerup sullitatsinnut neqeroorutigisinnaanera kissaataavoq, soorlu nunani allani taamatut iliortoqarnera nalunngikkipput, taamaattumik ullumikkut saqqummiussineq tulluusimaarutigaarput. Tusass Plus nunatta ineriartortinneranut iluaqutaassaaq, nioqqutit pitsaasut akimikkut allanngunngitsut aqqutigalugit nunap tamarmi ataatsimoortinneqarneratigut, pisortaaneq Kristian Reinert Davidsen oqarpoq.

Tusass Plus mobilinit attartorneqarsinnaasunit allanit akikinneruvoq aammalu toqqissisimatitsilluni, tassami sullitarput akiligassanik tupatsitsisinnaasunik nassinneqartartussanngilaq. Killeqanngitsumik oqaluussinernut SMS-ernernullu qaammammut akiliutit 199 kr.-it saniatigut, mobildata qanoq atsigisoq atorumanerlugu sullitatta namminneq aqussavaat. Tamanna aamma akigissaartumik ingerlassaaq. 

Tusass Plusitaarniaraanni nunatsinneersumik mobilnormoqarnissaq aammalu tusass.gl-imut nalunaarsorsimanissaq pisariaqarpoq. Quppernermut imminut sullissiffiusumut nutaamut nalunaarutigisoqarsinnaavoq pisariitsumik aammalu atuineq tassuuna aqunneqarsinnaavoq. 

Tusass Plusip siullermik innuttaasunut tuniniarneqarnissaa eqqarsaataavoq, inuussutissarsiutilinnulli naleqqussakkamik periarfissiissummik TELE-POST qanittukkut suliaqarluni aallartissaaq. Sullitagut inuussutissarsiummik ingerlatallit maannangaaq nuunnissaq kissaatigissagunikku, TELE-POST-imi siunnersortigisartik attavigisinnaavaat. 

Allanik paasisaqarusukkuit attavigiuk: Arnakkuluk Jo Kleist, ajk@telepost.gl, 547854