Menu

Mobilinut akit affaannanngorput

28/04/2014 - 15:36

Mobiltelefoneqarnermut akit tamaasa maajip aallaqqaataani TELE-POST-ip annertuumik appartissavai mobilpakkillu nutaat marluk saqqummiutissallugit.

TELE-POST-ip iliuusissanut pilersaarummut Sassarta 2014 – 18-imut atatillugu akit malunnaatilimmik appartinnissaat siunniuppaa. Mobilinut tunngasut siulliullutik appaavigineqassapput, ilaatigut SMS-inut aamma MMS-inut akit affaannanngussallutik.

- Nalunaarasuartaateqarnermi Aqutsisut mobilinut tunngasut akit nutaat appasinnerillu akuersissutigaat. Taamaattumik sisamanngornermi maajip aallaqqaataaniit sullitagut mobilillit akiliutiminnut naleqqiullugu annertunerujussuarmik pissarsiaqalernissaat, akimmi ullormi tassani 10 mio. kronit nalinginut appartissavagut, taama oqarpoq innuttaasunut kiffartuussinermut qullersaq Per Svendsen.

Akinik appaanerni iluaquserneqartussat ilaat tassaapput GSM-imik atuisut. Nioqqutitta nutaap Mobil Mikisoq-p GSM-imik atuisuuneq taarsissavaa, SMS-inut aamma MMS-inut akit affaannanngussapput, mobildatamullu MB-mut ataatsimut aki 1,75 kr.-iniit 1 kr.-imut apparneqassalluni. Ulluunerani aki qaffasissoq peerneqassaaq, taamaalilluni aki ulloq unnuarlu assigiilissalluni. Atuisut GSM-illit Mobil Mikisoq-mut TELE-POST-ip nuunnissai isumagissavai.

’TUSASS’ aamma akikinnerulissaaq

Mobili atorlugu oqaluussinernut akinik appartitsinerujussuaq TELE-POST-ip atuisuinut tamanut sunniuteqassaaq – aamma nunatsinni tamarmi ’TUSASS’-ilinnut. Siunissami taakku ullumikkut SMS-imut aamma MMS-imut akiliutigisartakkamik taamaallaat affaanik akiliisalissapput, paasissutissanullu aki 0,75 øre-nik appartinneqassaaq MB-mut ataatsimut 1 kr.-neqalerluni. Ulluunerani aki qaffasissoq atorunnaassaaq, oqaluussinernullu minutsimut aki ulloq unnuarlu assigiilissaaq aaliangersimasumik 1,23 kr.-qalissalluni.

Mobilpakket nutaat saqqummiunneqassapput

TELE-POST-ip mobilpakket nutaat marluk maajip aallaqqaataani aammattaaq nioqqutigilissavai atuisunut ilaatigut annerusumik pissarsiaqaataasut:

  1. Mobil Akulleq qaammammut 275 kr.-qassaaq, imaralugit akunnerni marlunni oqaluussisinnaaneq, SMS-ersinnaanerit MMS-imilluunniit nassiussisinnaanerit 500-t aammalu paasissutissanut atorneqarsinnaasut 0,5 GB-t.
  2. Mobil Angisooq qaammammut 350 kr.-qassaaq, imaralugit akunnerni pingasuni oqaluussisinnaaneq, SMS-ersinnaanerit MMS-imilluunniit nassiussisinnaanerit 1.000-t aammalu paasissutissanut atorneqarsinnaasut 1 GB-t.

Tapiliussamik atuisuuffik ’MobilData 300’ atorunnaassaaq, tassanngalu atuisuusut maajip aallaqqaataani TELE-POST-ip Mobil Angisooq-mut nuunnissai isumagissavai.

Akit nioqqutillu nutaat pillugit annerusumik atuarit nittartakkatsinni tele.gl-imi.