Menu

Nanoq mediamik internetimut isumaqatigiissut

13/09/2017 - 10:50
Nanoq Net pillugu suliamut aammalu imaatigut kabelimi aaqqissuussinermut atatillugu TELE-POST-ip oqaaseqaataa - Kommentar fra TELE-POST i forbindelse med sagen om Nanoq Net og reparation på søkablet.

Nanoq Media internetimik nioqquteqartuuvoq ingerlatseqatigiiffik Nanoq Net aqqutigalugu aammalu internetimik nioqquteqartutuaavoq Greenland Connectimi (imaatigut kabelimi) pilersaarutaalluni suliaqarnissamit sunnerneqartussaq. Nanoq Netip attaviinik attaveerutsitsigallarneq tamanna Nanoq Mediamit namminermit tusagassiuutiniillu allanit ulluni makkunani eqqartorneqarpoq.

Nanoq Mediap internetimik kiffartuussisuunermini aaqqiineq teknikkimut tunngasut pissutigalugit Kalaallit Nunaanni internetimut attavilerneqarsinnaanngitsoq atussallugu namminq toqqarpaa. Tassa taarsiullugu Danmark aqqutigalugu internetimut attaviligaapput. Siunertamut tamatumunnga Nanoq Mediap attaveqaateqarneq immikkut ittoq, tassa Islandip tungaanut imaatigut kabelimik taamaallaat atuisoq, atorpaa. Attavik taanna Canadamut imaatigut kabelikkoortunngorlugu allanngortinneqarsinnaanngilaq.

Internetimik nioqqutillit allat eqqarsaatigalugit, soorlu Comby, Inu:it, GTV aamma TELE-POST-imut namminermut, internetimut attaviliisoqartarpoq TELE-POST-ip Kalaallit Nunaanni tamanut atuuttumik attaviliineratigut, tassalu Islandimut imaatigut kabelikkut aammalu Canadamut imaatigut kabelikkut attaveqartitsisutigut.

Soorunami sullitatsinni tamani ingerlatsinikkut ajoquteqartoqannginnissaa piumanerugaluarparput. Ullumikkulli pissutsit allatut ajornartumik pisariaqalersippaat, Kujataanut imaatigut kabelimi aaqqissuussisariaqarneq pissutigalugu sapaatip akunnerata missaani imaatigut kabelimi Islandimukartumi attaviit piffissap ilaani attaveerutsittariaqarnerat. Tamanna Nanoq Netip eqqorneqaatigaa, internetimilli nioqqutillit allat eqqorneqanngillat.

Nanoq Mediap attavia immikkut ittoq 2016-imi pilersinneqarmat, taamani TELE-POST-ip malugeqquaa attaviup taamatut ittup kingunerisinnaagaa, kabelimik suliaqartoqalissappat sivisunerusumik attaveeruttoqarsinnaasarnissaa.

 

Allanik paasisaqarumaguit attaveqaqatigiinnermut pisortaq Arnakkuluk Jo Kleist, ajk@telepost.gl, tlf. 54 78 54-imut attavigineqarsinnaavoq.