Menu

Neriuffiit Kattuffiat aatsaat taama katersilluartigaaq

30/10/2020 - 23:44

Kalaallit Nunaanni Neriuffiit Kattuffiat “Neriuffik” tallimanngornermi oktobarip 30-anni 2020, nuna tamakkerlugu kræftimik eqqugaasimasunut katersuiniussimmat aningaasarpassuarnik aatsaat taama amerlatigisunik katersisoqarpoq, katillugit 3.923.213  kr.-it sinnerlugit. Neriuffiit Kattuffiata siulittaasua Mette-Sofie Jørgensen angusarujussuaq pillugu ima oqaaseqarpoq:

”Nunatsinni tamatta ataatsimoorluta nappaassuarmut kræftimut akiuiniarnitsini innuttaasut tamarmik tapersersuinerminnik annertuumik takutitseqqimmata qutsavigerujussuarpagut. Qanorluunniit oqassalluni nalunarpoq, qujamasunneq annertungaarmat. Tapersersuisunut tamanut, inuit ataasiakkaat, suliffeqarfiit, anginerusumik minnerusumillu tapisssuteqarsimasut qutsavigerujussuarpagut. Minnerunngitsumik ikiuuttut, TELE-POST, KNR, Katuaq kiisalu aliikkusersueqataasut pikkorissut sinerissamilu immikkoortortaqarfigut – qujanarujussuaq.”

Neriuffiit Kattuffiat katersuiniaasalermalli TELE-POST ikiuuttarsimavoq unnummi aliikkusersuinertalerlugu katersuiniarnermi Call centereqartitsinissamik tapiissuteqartarluni, tassa siarnguttunut tigooqqaaveqarnissaq isumagisarlugu. 

Unnuup ingerlanerani tapiissuteqarniarlutik inunnik suliffeqarfinniillu siarnguttunut tigooqqaapput inuit kulturikkut malunnaatillit, timersortartut, inuussutissarsiortut, qinikkat namminnerlu piumassutsuminnik ikiuuttut.

TELE-POST-ip pisortaanera Kristian Reinert Davidsen katersuiniarnermi angusaqarluartoqarneranik iluarisimaarinnittorujussuaq ima oqarpoq:

”Kræftimik eqqugaasimasut ilaqutaallu pillugit qanoq kalaallit ataatsimoorlutik suliami annertuumi ikioqatigiillaqqitsiginerat takullugu assut attortinnarpoq. Piffissami nalorninartorsiorfiusumi ikioqatigiillutalu tapersersoqatigiittarnissarput pingaaruteqaqaaq. TELE-POST-imissaaq misigisarparput nappaassuaq kræfti eqqugaasunut ilaqutaannullu qanoq sunniuteqartarnersoq. Taamaattumik tapersersueqataallutta ikiuuttarpugut. Katersuinermut tapiissuteqartut ikiuuttullu qutsavigerujussuarpavut, taakkuugassimi katersuiniarnerup iluatsilluarneranut peqqutaaqataalluinnartut.”

 

Sukumiinerusumik paasisaqarusunnermi attavigisassaq: Julie Rademacher, TELE-POST-imi paasissutissiisarnermut pisortaq, oqarasuaat +299 263535, email: julie@telepost.gl