Menu

Nunaqarfiit internetimik sukkasuumik atuisinnaanngorput

24/06/2019 - 09:55

Illoqarfiit assigalugit internetimut sukkasuumut nioqqutinik nunaqarfiit pissarsisinnaanngornissaat TELE-POST-ip ullumikkut ammaassiffigaa.

Illoqarfiit nunaqarfiillu tamarmik 4G-mut attavittaarfigisaat, Mobile First, suliarineqarluni siorna naammassivoq. Suliap tamatuma nunaqarfiit internetimik sukkasuumik atuiffiusinnaanngortippai.

Periusissaq 2016-imi siulersuisunit akuersissutigineqarmalli, periusissiami anguniagalersuisimanerit aallaavigalugit TELE-POST sulilluni aallartippoq. Tassani anguniagassanngortinneqartut ilagaat, innuttaasut 92%-iisa ukioq 2020 sioqqullugu internetimik sukkasuumik atuisinnaanngorsimanissaat. Nunaqarfiillu maanna internetimut sukkasuumut attaveqalermata, anguniagaq qanillivoq.

”Nunaqarfinnut arlalinnut internetimik sukkasuumik ullumikkumiit atuisinnaanngortitsinerput, tamannalu ilutigalugu killeqanngitsumik internetimut sukkasuumut atuisuuffinnik nutaanik neqerooruteqarsinnaalernerput, assut naammagisimaarparput. Digitalimik atortoqarnikkut nunatsinnut tamanna assorsuaq qaffariaataavoq. Innuttaasut amerlanersaasa sukkasuumik interneteqalernissaannik siunertaqartumi 2017-imiit 2020-mut periusissiami, TELE-POST taamaalilluni siuariarluarpoq”, TELE-POST-imi pisortaaneq Kristian Reinert Davidsen oqarpoq.

Nunaqarfinnut internetti

TELE-POST internetimik sukkasuumik nunaqarfinni ukunani siullermik ammaavoq:

Kapisillit, Atammik, Itilleq, Kangaamiut, Napasoq, Sarfannguit, Akunnaaq, Attu, Iginniarfik, Ikamiut, Ikerasaarsuk, Ilimanaq, Kangerluk, Kitsissuarsuit, Niaqornaarsuk, Oqaatsut, Qeqertaq aammalu Saqqaq.

Kujataani imaatigut kabelip aaqqissuunneqarnera naammassippat, nunaqarfiit uku sukkanermik interneteqalissapput: Alluitsup Paa, Arsuk, Eqalugaarsuit, Igaliku, Narsaq Kujalleq, Qassiarsuk, Qassimiut, Saarloq, Tasiusaq, Aappilattoq aammalu Narsarsuaq.

Kiisalu, Ilulissat Uummannallu akornanniittup sakkortusaaviup aasap naajartornerani qaffatsinneqarsimalerpat, nunaqarfiit uku sukkanermik interneteqalissapput:

Upernavik Kujalleq, Kangersuatsiaq, Aappilattoq, Tasiusaq, Nuussuaq, Kullorsuaq, Naajaat, Innaarsuit, Nutaarmiut, Niaqornat, Qaarsut, Ikerasak, Saattut, Ukkusissat aammalu Qeqertarsuatsiaat.

Nunatsinni nunaqarfiit kattufiat KANUNUPEp siulittaasuata nuannaarutigaa nunaqarfiit illoqarfiit assigalugit sukkasuumik internetteqalersinnaanerat.

”Nunaqarfiit amerlanerit Tusass internetimik saqqummiivigineqarnissaannut atasumik, KANUNUPE-mik qanimut suleqateqarsimaneq nuannaarutigaarput. Naak nunaqarfiit arlalinnguit aasap naalernerani aatsaat attavinissagaluartut, TELE-POST-ip saqqummiussinissamik pilersaarutaanut naammagisimaarinnillutalu paasinnippugut.

Nunaqarfimmiut killeqanngitsumik atuilertussat qularutissaanngitsumik periarfissatigut assigiinngitsutigut malugusussaqqaarput, atorluarnissaanullu kissaappagut.”

KANUNUPEp siulittaasua Jens Kristian Therkelsen oqarpoq.

Nunaqarfinnut Tusass internet pillugu annertunerusumik atuarit uani: tusass.gl

Allanik paasisaqarumaguit apeqqutissaqaruilluunniit, taava attaveqaqatigiinnermut suleqataasoq Paarnaq Hansen attavigiuk ukunuuna: mail panah@telepost.gl imaluunniit mobil +299 563376-imut.