Menu

Nuummi qullersaqarfimmi eqqumiitsulianik pinnersaaneq

30/04/2018 - 15:30

Miki Jacobsenip TELE-POST-ip qullersaqarfia kalaalerpaluttunik pinnersarpaa. Pinnersaanerup isumassarsiarinera, Mikip nammineq oqaluttuarnera atuakkit assillu isiginnaarlugit.

2018 aallartilaartoq pisortaanerup Kristian Reinert Davidsenip POST-imullu pisortap Per Svendsenip isumaqatigiissutigaat TELE-POST-ip qullersaqarfia pinnersarneqassasoq. Siornatigut taamatut iliortoqareerpoq Nuummi Teletårnip isertarfiisa eqqaanni, eqqumiitsuliortup Camilla Nielsenip iigaq suluppaakkanik qalipaaffigimmagu, tamannalu ukiut ingerlaneranii inuppassuarnit nuannarineqartuarsimavoq.

Qullersaqarfiup iigaanik pinnersaanissaq kalaalerpaluttunik assiliartaqassasoq aalajangiunneqarpoq aammalu Miki Jacobsenip qalipaatit ersarissut atussagai.

- Suliarinnittussaq Mikiussasoq pissusissamisuuginnarpoq, Mikimmi ukiut 20-t missaannik kalaallit frimærkiinut assitalersuissuttarsimavaatigut. Pinnersaanerup amerlasuunit nersualaarneqarnera tusareerpara aammalu amerlasuut sorlermik nuannarisaqarnerunerat paasereerlugu, Per Svendsen oqarpoq, qungujulallunilu nangippoq:

- Inini tamanit isersimaffiusartuni eqqumiitsuliaqarnerunissaa assut soqutigaara, oqartarpungalu – kakkaa majuartarfeqarfinni iikkat qaqortuinnaangaaramik.

Miki Jacobsenip isaanit isigalugu

Qullersaqarfimmi iikkat arfineq pingasut Mikip pinnersarpai. Qalipakkat arfineq marluk majuartarfeqarfinni marlunni nutarteqqammisuni, aammalu qalipagaq ataaseq ataatsimiittarfimmi annerpaami. Qalipakkat suuneri Miki Jacobsenimut tamarmik immikkut isumaqarput.

- Siullermik TELE-POST-imut qujanarujussuaq iikkat toqqaannartumik pinnersarnissaannut suliassiisumut pissanganaqisumut. Aamma ukiut 25-t sinnerlugit TELE-POST-imut frimærkiliassanut ilusilersuisarsimanera nuannaarutigaara. Pinnersaanissamik suliakkerneqarneq taamatut ittoq ataqqinaataallunilu unamminartuuvoq angisoorujussuaq. Soorunami neriuutigaara sulisut aammalu qullersaqarfimmut pulaartut suliannik nuannarinnikkumaartut, Miki Jacobsen oqarpoq nangillunilu:

- Matumunnga tunngatillugu TELE-POST-ip suliniuteqarneranut nunatsinni suliffeqarfiit allat isumassarsisimanissaat neriuutigaara aammalu nunatsinni eqqumiitsuliortut pikkorissorpassuit ilaat taamatut suliakkerumaaraat, Miki Jacobsen oqarpoq.

Mikip suliaanut kusanartorsuarnut TELE-POST qujarujussuarpoq. Assut isiginnaakkit Mikillu qalipakkat pillugit nammineq oqaasertaliinera matuma ataani atuarlugit.

Tuulliit

Tuullik assiliartaliukkusunnartunik meqqulik timmiaq nammineq kusageqaara aammali timmiaavoq kalaallit oqaluttuatoqaataanni kulturitoqaannilu pingaarutilik. Assersuutigalugu qajartortartunut aarngussakkut tuulliup piginnaasaasa ilaanik piginnaaneqalersinnaanerminnik upperinnittunut aarngussatut, soorlu sukkasuumik nalussinnaasutut.

Iikkami portusuumi (elevatorip sulluani) tuulliit marluk papii silataaniit takuneqarsinnaapput. 

Qaannat

Kalaallit Nunaanni tulluusimaarnartumik kingornussaraavut qaannat. Teknologii atorneqalinngikkallarmat qanga piniarnermut angallataanermi saniatigut qajaq aamma nalunaaruteqariartornernut allakkisarnermullu atorneqartarpoq sukkanerpaaq. Qajaq ullumikkut allatut atorneqarpoq, annerusumik timersornermut, aammali sunngiffimmi sammisaqaatitut.

Qimmit qimuttut

Sisimiuni alliartorsimanera tulluusimaarutigaara, qimusserartuartarsimavungami. Qimmit qimuttut uani qalipatakka soorunami POST-ip qimmerai qimuttut. Allakkanik aatsineq pineqaleraangat qimussit allakkisartartut oqaluttuassartamut ilaapput. 

Nannut

Nannut Issittumut ilisarnaatinut ilaalersimapput. Oqaluttuatoqaatitsinni nannut pillugit oqaluttuarpassuaqarpoq. Itsaq inuit uumasuunersut imaluunniit uumasut inuunersut qulakkeerneqarsinnaasarsimanngilaq, inuimmi oqaluttuatoqqat malillugit allanngorsinnaasarsimammata. Nanoq assigiinngitsutigut “naligisatut” isigineqartarsimavoq, ilaatigut piniartarnera aamma pissutigalugu.

Tuttut

Canadami Nunavumi angut utoqqaq taamaallunga peraara, tuttut sooq ’tuttu’-mik taaneqartarnersoq. Akissutigivaa tuttut ukiukkut apummi sermimilu nerisassarsiortillutik kukiffamminnik nipiliortarnerat tassaasoq tuttu.

Nattoralik

Nattorallit sooq qalipattarnerannut naatsumik nassuiaataavoq alutornarnerat.

Nakuussusia, silassorinnera, piniartarnera, aalisartarnera. Uagut nattoralipput isikkumigut piginnaasanik taakkuninngarpiaq takutitsisoq pillugu tassa oqaasertaliussassat ilaat. Nattoralik uannut uumassusiliuvoq takorlooruminartoq, qujanartumik isiginnaartuarsinnaasara. Timmissamik allamik piniarnera aalisartarneralu isigisaq tupinnartaqaaq. Nunatsinni nattoralipput ukiuni tuusintilinnik maani uumasuusimavoq. Pinngortitaq uagullumi immitsinnut aamma eqqarsaatigaluta mingutsitsineq qanorluunniit ittoq pinngitsoortinniartussaavarput, taamaalilluni uumassusilinnut tamanut siunissaq qaamasuuniassammat.