Menu

Nuummi TELE-POST Centeri nalinginnaasumik ammasaqqilerpoq

21/04/2020 - 09:18

Nuummi TELE-POST Centerip sulisussani tamaasa sulisoralugit nalinginnaasumik ammasaqqilissaaq marlunngornermi 21 april, 2020.

Coronamik tunillatsissinnaaneq minnerpaaffianiitinniarlugu, suliffeqarfiullu ingerlaannarnissaa qulakkeerniarlugu, Coronavirusimik ajornartorsiuteqarnerup nalaani Tele-Postip sulisui,  marlunnut avillutik suliartortarsimapput.

Maanna nappaatip tunillaasinnaanera killilersimaneqalermat, aamma meeqqanut paaqqinnittarfiit, atuarfiit pisiniarfiillu mianersortumik ammariartuaartinneqalermata, Nuummi TELE-POST-ip Centeria aamma ammarneqassaaq.

Tamanna isumaqarpoq Nuummi sullinneqartartut tamarmik TELE-POST-ip Centeriani aqaguminngaanniit pisarnertut sullinneqaqqilissasut, nalinginnaasumik ammasarfiit nalaanni:

Ataasinngorneq – Tallimanngorneq nal. 10:00 -17:00

Arfininngorneq: 10:00-13:00

Coronamik ajornartorsiuteqarnerup nalaani pisortat maleruaqqusaat Nuummi TELE-POST Centerip suli malippai, atuisartunilu qinnuigalugit najoqqutassianik malinneqqissaarnissaannik, allanik mianerinninnissaannik  aamma inuit imminnut minnerpaamik 2 meterinik avissaarsimasarnissaannik.

Pisiniarfik inoqarpallaaleraangat  TELE-POST-ip pisiniarfimmut isersinnaaneq killilersulertarsinnaavaa, inimi inuit isersimaqqusaasut amerlassussaat qaangerneqartannginniassammat.

Taamaattumik atuisartuvut qinnuigissavavut pisiniarfiliartarnertik ullup ingerlanerani ataavartumik ingerlattaqqullugu, tassa ulloqeqqarnerinnarminni aamma soraarfiup nalaaniinnaanngitsoq takkuttaqqullugit.

TELE-POST-imi sulisut pisortallu kissaatigaat atuisartut tamarmik toqqissisimanissaat, sapinngisamillu pitsaanerpaamik sullinneqarnissaat.