Menu

Qaqortup eqqaani imaatigut kabelimik suliaqarneq kinguartippoq

22/05/2019 - 09:00

Tussiarfissuup nalaani sulinngiffeqarnermi, TELE-POST-ip imaatigut kabelimik aaqqissuussisua umiarsuaq Qaqortup eqqaani aaqqissuussisariaqarnernik misiliigaluarpoq iluatsinngitsumik. Kalaallit Nunaata Kujataani sikunik nalunaarutit paasinarsisippaat piffissami qanittumi sikoqarnera ajoraluartumik pitsanngornavianngitsoq. TELE-POST-ip umiarsuaq aaqqissuussisoq, sikunik alapernaarsuineq aammalu najukkami ilisimasallit isumasioqatigereerlugit taamaattumik aalajangerpoq, aaqqissuussineq sikorsuaqareernissaanut kinguartinniarlugu.

Ukioq aammalu upernariartoqqaalernerani sila assut unerisimasimanngilaq, tamatumalu Qaqortup eqqaani suliniarneq ajornarluinnartissimavaa. Taamaattorli neriuutissaqarfiusimavoq sikorsuit takkutinnginneranni piffissamik naammattumik silagiffeqarnissaanik. Tamannali pisimanngilaq. Sikorsuit tikiunnerisa kingorna TELE-POST-ip inuit arlallit silamik sikullu pissusaannik ilisimasaqarluartut suleqatigalugit, periarfissat tamaasa misissorsimavaat suliassap naammassineqarsinnaanissaanut. Sapaatip akunnerata naanerani iluatsingajakkaluarpoq, ajoraluartumilli sikup aammalu sarfarnerujussuata suliassaq naammassineqanngitsoortippaat.

- Sisimiut eqqaanni imaatigut kabelimi ajoqusernerit marluk aaqqissuunneqarnerisa naammassineqarsinnaasimanerat assut nuannaarutigaara. Tamanna Avannaani sullitatsinnut assorujussuaq pingaaruteqarsimavoq. Qaqortulli eqqaani suliaqarnerup maannakkut ingerlanneqarsinnaannginnera assorujussuaq uggornarpoq. Piffissami sivisuumi imaatigut kabelimi ajoquteqarnerit sullitatsinnut assut ajoqutaasimapput. Tamanna aammattaaq sulisutsinnut oqimaassimaqaaq, taakkumi sullitat pitsaasumik misigisaqarnissaat sapinngisartik tamaat anguniartuarpaat, pisortaaneq Kristian Reinert Davidsen oqarpoq.

Suliaqarfiup eqqaaniit sikorsuit qaqugu saavinnissaat eqqoriaruminaappoq. Taamaattumik TELE-POST-ip naatsorsuutigaa aaqqissuussineq aggustip aallartinnerani naammassineqassasoq, taamanikkussamummi sikorsuit qaangiutereersimanissaat ilimanarluinnarmat. Tamatuma tungaanut TELE-POST-ip sapinngisani tamaat attaviit allanngoranngitsut qulakkeerniassavai. Taamaattorli piffissami aggersumi, tassa Qaqortup avataani aaqqissuussinerup pingaarutillip naammassineqarnissaata tungaanut, ingerlatsinikkut ajoquteqartoqartarnissaa, pingaartumik internetimik kiffartuussinermi, pisarsinnaassaaq.