Menu

Sakkortusaavik tatineqarpoq

01/08/2016 - 08:11
2016-ip ingerlanerani sakkortusaaveqarfinni najugallit imaassinnaavoq internetimik atuinerminni ajornerusumik misigisaqartarsinnaasut.
 
Nioqqutinut nittarsaassinermullu pisortaq Brian Smedemark nassuiaavoq:
 
- Teknikkikkut siuariartornerup kingunerisaanik sullitat datamik pisariaqartitsinerat soorunami aamma qaffakkiartorpoq. Sakkortusaavilli qanga datamik pisariaqartitsineq annikinneerarsuugallarmat sanaajuvoq. Taamaattumik piginnaasap qummut killissaa ukioq manna angusussaavarput – pingaartumik nunatta avannarpasinnersaani.
 
Sullitatta pingaartumik nangeqattaartunik filminillu internet aqqutigalugu isiginnaarnerminni, ass. Netflixikkoorlugu, ajornartoortarnissaat ilimanarpoq. Akornutaasinnaasut  minnerpaaffianiitinniarlugit TELE-POST-imi teknikerit maanna sulipput. 
 
- Sakkortusaaviup piginnaasaanik sullissisuusugut arlaliussinerput pissutigalugu ajornartorsiummik tamakkiivissumik qaangiiniarneq ajornakusoorpoq. Imaatigut kabeli avannaanukartoq ikkussorneqariarpat, ajornartorsiut qaangerumaarparput, Brian Smedemark nassuiaavoq.
 
Piginnaasamik ajornartorsiuteqarneq pissutigalugu maannakkut sakkortusaavimmi internetimik nioqqutitta pitsanngortinnissaat ajornarpoq. Taamaattorli mobililinnut nuannersunik nutaarsiassaqarpoq.
 
- Ukiamut mobililinnut attartornerit nutaat saqqummiunneqarnissaat sullitatta qilanaarisinnaavaat, taakkumi pitsaanerullutillu akinnerupput, Brian Smedemark nassuiaavoq.