Menu

Sakkortusaavinnik suliniut sikumit unammilligassinneqarpoq

01/06/2017 - 11:50

TELE-POSTip periusissiaani nutaami anguniakkat ilaat ataaseq tassaavoq attaveqaatit pitsanngorsarneqarnissaat, taamaaliornikkut internetti sukkasooq innuttaasut 92 %-iinit atorneqarsinnaalersinniarlugu. Suliassaq ilaatigut tassaavoq sakkortusaaviit annertusineqarlutillutillu sakkortunerulersineqarnissaat, suliassarli tamanna ukiuuneranit unammilligassinneqarpoq.

Sakkortusaavinnik suliniut tassaavoq Uummannap Upernaviullu akornanni sakkortusaaviup tallineqarnissaa, kiisalu Aasiaat, Qasigiannguit aamma Ilulissat akornanni sakkortusaaviup sakkortusineqarnissaa. Sakkortusaavinnik suliniut Upernavimmi aallartinneqareerpoq, sanaartornerli Avannaani sikuuneranit unammilligassinneqarpoq.

Ukiunut allanut sanillilullugu ukiuunera sakkortusimavoq, nunalu tamakkerlugu aperujussuarlunilu sikorujussuarsimavoq. Tamatuma kingunerisaanik stationit suliaqarfigineqartussat suliffiginissaat maannamut pisinnaasimanngilaq, tamannalu sakkortusaaviit suliarineqarnissaannik kinguaattoortitsivoq. 

- Iliuuserisinnaasavut tamaasa atorlugu angumersiniarsarivugut, piffissaliussatulli pilersaaruterput ukiormanna ukiumi aputeqarluarnera pissutaalluni nukingernarsilaalerpoq. Tamannali maannamut sakkortusaavinnut suliniutip tamarmi kinguaattoorneranik kinguneqanngilaq kisianni oqarsinnaavugut ukiormanna Upernaviup angumerinissaa unammillernartoq. Sanaartornermik suliaqartitavut oqaloqatigaavut, aammalu ukiormanna naammassisinnaanissaq anguniarlugu qanoq iliorsinnaanerluta misissorlugu, Teknikkimut IT-imullu pisortaq, Jonas Hasselriis, oqarpoq.

Uummannap Upernaviullu akornanni sakkortusaaviit tallineqarnerisa naammassineqarnissaat 2017-imi oktobarimi pisussatut pilersaarutaagaluarpoq.