Menu

Seqernup maligaasaasa ajoqusersuinerannit attaviit ajoqusersorneqarput

06/10/2017 - 10:21

Ukiut tamaasa ukiup taamaalinerani qaammataasamut attavik kipisaqattaalersarpoq seqernup maligaasaanit ajoqusersorneqarneq pissutaalluni.

Sapaatiuppat oktoberip arfineq-pingajuaniit arfininngornermut oktobarip 21-ata 2017 tungaanut sullitatta qaammataasakkut attavillit attavimmik kipisaqattaartarsinnaanerat malugisassavaat. Sumiiffiit ilaanni minutsini tallimani attaveeruttoqaqattaartarsinnaassaaq, allanilu akunneq ataaseq angullugu sivisussuseqartarsinnaassallutik. 

Seqernup maligaasaasa ajoqusersuinerat

Seqernup maligaasaasa ajoqusersuinerat pilersarpoq seqineq qaammataasallu tigooraavia naligiikkaangata, tassa qaammataasap tigooraaviata seqinermiit ”nipiliornerit” tigooraleraangagit. Seqernup qinngorneri qaammataasamit sakkortunerusarput, seqernullu nipiliornerata qaammataasamiit signali nipaarutsittarpaa.

Sumiiffiit sunnerneqartussat

Sumiiffinni tulliuttuni qaammataasakkut attaveqarfiusuni, sullitatta kipisaqattaarnerit malugisarumaarpaat: Qaanaaq, Pituffik, Savissivik, Upernavik, Upernavik Kujalleq, Narsaq Kujalleq, Nerlerit Inaat, Ittoqqortoormiit, Tasiilaq.