Menu

Sianerfigineqarsinnaasoq HOTLINE attaveqaatillu TELE-POST-ip qulakkeerpai 

13/03/2020 - 14:24

Tusagassiortunik katersortitsinermi 13. marts 2020, Naalakkersuisut Siulittaasuata Kim Kielsenip nalunaarutigaa, telefonikkut sianerluni attavigineqarsinnaasumik pilersitsinissaq aalajangiunneqartoq, innuttaasut ernumassuteqarunik Coronavirus pillugu apeqquteqarfigisinnaasassaannik. Sianerluni attavigineqarsinnaasoq maanna atulereerpoq, tamannalu pillugu nalunaarut naalakkersuisut.gl-imi https://www.nun.gl/.

 

 

Nuna tamakkerlugu sianerfigalugu attaveqarfiusinnaasup Hotlinep teknikkertaanik TELE-POST erhverv isumaginnittuuvoq.  

 

Maanna pisuni nunatta atassuteqaqatigiinnera TELE-POST-ip qulakkiigassaraa. Akisussaaffimmut annertuumut tunngatillugu TELE-POST-ip pisortaanerata, Kristian Reinert Davidsenip suleqatini innuttaasullumi, qiimmassarlugillu kajumissaarpai: 

 

  • Pisumi immikkut ittumi maanna ataatsimooqatigiittariaqalerfitsinni, kisiannili immitsinnut qanippallaarnata – atassuteqaatit, TELE-POST-ip qulakkiigai, tassarpiaapput uatsinnik immitsinnut ataqatigiissitsisut.  

 

  • Nunami inuiaqatigiinnilu ikorfartuussisutut suliffeqarfiit annerpaat ilaattut, nunap tamarmi atassuteqaannarnissaanut qulakkeerinnittutut, suliassaq TELE -POST-imut pingaaruteqaqaaq. Akisussaaffik tiguseqataassaagut siullersaallutalu peqatigiilluta Coronavirusimik pitsaaliuilluni sulinermi, sapinngisarpullu tamaat iliuuseqassaagut, Kalaallit Nunaannut kalaallinnullu pisoq manna qaangerluarneqarniassammat, TELE-POST-ip pisortaanera, Kristian Reiner Davidsen oqarpoq. 

 

Nuna tamakkerlugu sianerfigalugu attaveqarfiup HOTLINE-ip normoraa: 801100 

 

Allanik paasisaqarumagaanni imaluunniit apeqqutissaqaraanni attaveqaqatigiinnermut pisortaq Julie Rademacher mailimut uunga julie@telepost.gl-imut imaluunniit mobil +299 263535-imut attavigineqarsinnaavoq.