Menu

Sisimiut kujataani imaatigut kabeli ajoquteqartoq

22/01/2019 - 14:53

 

Maanna qulakkeerneqarpoq Sisimiut kujataani imaatigut kabeli ajoqusersimasoq. Maniitsumiik avannaanut attaveqaatit sakkortusaaviup attaveqaataatigut ingerlalernerannik tamanna kinguneqarpoq

- Kikkut tamarmik attaveqarsinnaanissaat sianernissamullu periarfissaqarnissaat qulakkeerumallugu aaqqiisariaqarsimavugut sakkortusaavikkut attaveqaatit ingerlaartussanngorlugit. Ilaatigut 4G-mut attaveqaaterput utaqqiisaagallartumik qamittariaqarsimavarput. Attaveqaatit qanoq pittanngorsarneqarsinnaanerat teknikeritta maanna misissuiffigaat, taama oqarpoq teknikkeqarnermut IT-qarnermullu pisortaq Jonas Hasselriis.

Maniitsup avannaaniit Kullorsuaq tikillugu inuinnaat atuisut internetimut attaveqarnerisa kingaallinerat taamatut pisoqarnerata ajoraluartumik kinguneqaatigaa. Angerlarsimaffinni mobildata-kullu interneternerit tamarmik sunnerneqarput. Oqarasuaatikkulli attaviit naliginnaasut pisarnermisut ipput.

Inuussutissarsiuulinnik- wholesalmilu internetimut atuisugut attavigivagut, attaviullu kigaallinerata annikinnerpaamik taakkununnga sunniunnissaa anguniarlugu siunnersorneqassallutik.

Imaatigut kabelip aaqqissorneqarnissaa

Siornatigut nalunaarutigeriikkatsitut decembarip 27-ani 2018-imi Nuup Qaqortullu akornanniittup imaatigut kabelip attaveqaataa ajoquteqalerpoq. Siullermik pilersaarusiornermi naatsorsuutigineqarsimavoq imaatigut kabelip aaqqissorneqarnissaa sapaatip akunnerinik pingasunik tallimanilluunniit sivisussuseqassasoq, pilersuisorisalli attaveqarfigereernerisa kingorna paasinarsivoq aaqqissuiartortussanik pilersorneqarnissaq ilimagisamiik sivisunerussasoq, imaatigut kabelinik angallatit suliaqartartut maannakkorpiaq allanik suliaqarnerat peqqutigalugu. Taamaattumik Sisimiuni kujataanilu imaatigut kabelit aaqqiivigineqarnissaat sivittorsinnaavoq.

– Maannakkut ajoraluartumik iluatsitsinerliorpugut marlunnimmi imaatigut kabelinik ajortooqqavugut, tamannalu atuisutsinnut amerlaqisunut kinguneqarnerlulluni. Iliuusaasinnaasulli tamaasa atorlugit pisoq pitsanngorsaaviginiarsaraarput. Pilersuisorisagut qanimut suleqatigaagut maannalu angallammik imaatigut kabelinik ajoqusersimasunik aaqqissuisinnaasumik nassaarsimalluta, Jonas Hasselriis taamatut oqaaseqarpoq.

Kilisaatersortut sissueqquneqartut

Imaatigut kabelip ajoqusersimanera kilisaammeersimassasoq takussutissartaqarpoq. Tamakkiisumilli inerniliussamik nalunaaruteqaqqaartigata misissuiffigilluaqqaartariaqarparput.

– Kilisaatersortut eqqaasikkusuppakka imaatigut kabeli immap assingini nalunaarsorneqarsimammat, angallatillu aalisariutit imaatigut kabelip qanittuani angalatillutik sissueqqissaartariaqarput. Nunatsinni attaveqaqatigiinneq pingaaruteqarluinnartoq uani pineqarpoq, ajoqutillu nalaatagut imaaliallaannaq aaqqinneqarsinnaanatik, taamak oqarpoq teknikkeqarnermut IT-qarnermullu pisortaq Jonas Hasselriis.