Menu

Statsministerip borgmesterillu kalaallip Danmarkip frimærkinik takutitsinersuani TELE-POST-ip takutitsiveqarfia alakkarpaat

15/11/2017 - 16:17

”Frimærkinik, Allakkanik Postkortinillu takutitsinersuaq 2017”, Frederiksberg Frimærkeklubbimit aammalu Danmarks Frimærkehandlerforeningimit aaqqissuunneqartoq sapaatip akunnerata naanerani Scandic Hotel Copenhagenimi ingerlanneqarpoq.

Frimærkinik katersisartorpassuit Danmarkip illoqarfiisa pingaarnersaannut aggiapput, Danmarkimi ukiumoortumik frimærkinik takutitsinersuarmi frimærkinik paarlaasseqatigiinniarlutik, minnerunngitsumillu frimærkinik nutaanngitsunik nutaanillu pisiniarlutik. Frimærkinik nioqqutillit saqqummiisimanerit nutaannginnerit tuniniarpaat, allakkeriveqarfiilli peqataatitaqartut frimærkinik nutaanerpaanik aammalu katersiumatuut pilerigisartagaannik tuniniaallutik.

Allakkeriveqarfiit peqataasut ilagaat TELE-POST, taannalu kusanaqisumik angisoorsuarmillu saqqummiiveqarpoq. Kalaallit Nunaata qanittukkut ataatsimoorussamik saqqummiussaqarnermi saqqummiussaa Det Franske Antarktiske Territorium-imik taaguutilik katersisartut akornanni assorsuaq pilerigineqarpoq. Taamatuttaaq ippoq TELE-POST-ip 2014-imi frimærkinut atuakkiaa Kalaallit Nunaanni ilisimasassarsiornernut tunngasoq, Kalaallit Nunaanni inuinnarnik timmisartunik angallassinerup oqaluttuassartaanik atuakkiaq 2016-imeersoq kiisalu 2017-imi ukiup mappea. Mappe taaneqartoq kingulleq ukiumi tassani frimærkilianit tamanit ataatsimik imaqarpoq. Nioqqut katersisartut akornanni assut nuannarineqarpoq.

Nioqqutissiornermut pisortaq Hjørdis Viberg tulluusimaarluni ima oqaluttuarpoq:

- Katersisartut sullitarisatta qanittumik attaviginissaat pingaaruteqarpoq. Qallunaat katersisartut takunerput nuannariuaannarpaat. Ukiumoortumik takutitsinersuarmut tassunga katersisartut nunani allaneersut aamma tikiuttarput, qularnanngitsumik kulturikkut pissanganartulimmi inissisimanera pissutigalugu. Frimærkinik Kalaallit Nunaanneersunik katersisartut aammattaaq nalunngilaat ukiut tamaasa tassani naapissinnaalluta.

 

- Ukioq manna immikkuulaartunit alakkarneqarpugut, tassami Sermersuumi borgmesterip Asii Chemnitz Narupip kiisalu Danmarkimi statsministerip Lars Løkke Rasmussenip nuliatalu savalimmiormiup alakkarpaatigut. Takutisinersuup ullua kingulleq suli soqutiginarnerulersippaat. Soqutiginninnerat tapersersuinerallu nuanneqaaq.

 

Takutitsinersuaq pillugu allanik atuarit uani: http://www.3fff.dk/2017/09/03/frimaerke-brev-postkort-messe-2017/.

TELE-POST-ip frimærkiliai pillugit atuarit uani: www.stamps.gl-imi aamma www.facebook.com/stamps.gl-imi.