Menu

Tasiilami Flatrate internetsi

02/02/2021 - 09:47

TELEPOSTip Tusass Flatrate internetsi Tasiilami nunaqarfittaanilu atulersussaq ullumi saqqummiuppaa. 

Tasiilami nunaqarfittaanilu sullitagut atuisuussutsit nutaat atorlugit internetsimik killeqanngitsumik qaammammut atuisinnaalerput. TELEPOST-ip Tasiilami flatratemik nioqqutinik saqqummiussineratigut sullitagut pisiamik qaavatigut allanik akiligassinneqartarunnaarput, Tusass-imillu atuisuussutsit neqeroorutigineqalersut arlaannik piumasaminnik toqqaasinnaalerlutik.

Tasiilami internetsimik atuinermi sukkassutit pingasut periarfissanngorput:

1/0,5 Mbit  

2/1 Mbit   

4/1 Mbit

Tasiilap nunaqarfittaani maannamut internetsimik atuinermi sukkassutsit  1/0,5 Mbit aamma 2/1 Mbit kisimik periarfissaajunnaassapput.

Nioqqutinut Niuernermullu immikkoortortami pisortaq Lars Rasmussen oqarpoq: 

“Tasiilami sullitagut nioqqutinut pitsaanerusunut sivisuumik utaqqisimapput. Taamaammat ullumi ulloq nuannaarutissaavoq, nioqqutit Flatratet qaammataasakkut attaveqarfiusumi siullerpaamik saqqummiunneqarmata. Tasiilaq tassaavoq qaammataasakkut attavilinni nioqqutitsinnik flatratenik akikinnerusunillu siullersaalluni nioqquteqarfiulersoq Ittoqqortoormiit tullinnguutissapput attaveqaqatigiinnikkut nutarterisoqareerpat nunamilu tigooqqaassutissaq tulleq piareerpat.”

TELE-POST-imi Nioqqutinut Niuernermullu pisortaq taamaattoq erseqqissaavoq:

“Tasiilami sullitagut internetsikkut soorlu filmik netfliximillu qaavatigut akiligassarsinatik isiginnaarsinnaaleraluartut, taamaattoq internetsikkut attaveqarnerat imaatigut kabileqarfiusunisulli sukkatigilernavianngilaq. Tamanna teknikkikkut pissutsinik - tassa imaatigut kabilikkut sakkortusaavitsigullu attaveqarnermik illuatungaanilu qaammataasaannakkut attaveqarnermik peqquteqarpoq.”

Tasiilamiittut qanoq ilillutik ajornanngitsunnguamik Tusass flatrate internetsimik piniarnissartik tusass.gl-imut iserlutik imaluunniit TELE-POST Centerimut ornigullutik 808080-imulluunniit akeqanngitsumik sianerlutik paasiniarsinnaavaat.