Menu

TELE-POST Elite Sport Greenlandilu suleqatigiinnerminnik sivitsuisut

09/02/2021 - 11:10

Nuuk 9. februar 2021. Assimi takuneqarsinnaapput isumaqatigiissummik atsioqatigiittut Elite Sport Greenlandimi siulittaasup tullia Inooraq Brandt aammalu TELE-POST-imi Tunisassiornermut Ussassaarusiornermullu Pisortaq Lars Rasmussen.

TELE-POST Kalaallit Nunaanni piukkunnaatillit pikkorivissortullu timersornermik aallussisut iluaqutigisaannik Elite Sport Greenlandimik suleqateqarnerminik sivitsuivoq. TELE-POST-immi timersortartut ineriartorneri upperinerilu pingaartippai, taamaammallu ESG-mik tapersersuinini pissusissamisoortutut isigalugu.

-TELE-POST-imit kinguaariinni tulliuttussat salliutikkusuppagut, takusinnaagatsigu timersornermut piginnaaneqartuusut sungiusartarnermikkut anguniakkatik anguniarlugit tunniusimallutillu tamaviaallaqqissuusut. Ilikkartarpaammi sungiusarnissaminnut pilersaarusiornerit, ingerlanniakkanik aaqqissuussinerit aammalu allanik peqateqarnissaat. Taasat piginnaaneqarfigilerneri inuiaqatigiinnut iluaqutaajumaartut upperaagut, Lars Rasmussen, TELE-POST-imi tunisassiornermut ussassaarinermullu pisortaasoq, erseqqissaalluni oqarpoq.   

TELE-POST-imi upperaarput timersorneq inuup piginnaaneqarneranut, piumassuseqarneranut aammalu imminut, avatangiisinut kiisalu timersornermut atatillugu akisussaassuseqarnermik pilersitsisartoq. Tamakkulu pingaartitassat Elite Sport Greenland-imit sulissutigineqarput – tassa sammisanut piumassuseqarluni tunniusimaneq tunniutiinnartannginnissarlu.

ESG-mi siulittaasup tullianit, Inooraq Brandt-imit Kalaallit Nunaanni suliffeqarfiit pingaarnerpaat ilaannik suleqateqarnerup ingerlaqqittussanngornera nuannaarutigineqarpoq.

-TELE-POST-imik suleqateqarneq Elite Sport Greenlandip suliniuteqarneranut pingaaruteqaqaaq. Tapiiffigineqarnerlu soorunami pingaaruteqarpoq ESG-ip suliniutaasa pitsaassutsikkut qaffasissuunissaannut, kisianni aamma ESG-mut pingaaruteqarluinnarportaaq suleqatigisap TELE-POST-ip inuiaqatigiinni pingaaruteqartumik inissisimasuunera. Suleqatigiinnitsigummi piukkunnartussarsiornitsinni siammasinnerusumik ujartuisinnaanerput periarfissinneqarpoq, tamannami ESG-p periusissiamini nutaammi nukittorsarumammagu. Taamaattumik TELE-POST tassani suleqatigigatsigu immikkut nuannaarutigeqaarput, ESG-mi siulittaasup tullia Inooraq Brandt oqarpoq.  

Kisiannili timersortartut kisimik tapiiffigineqarneq iluaqutiginngilaat, aammali siammasissumik isigalugu TELE-POST-ip sulisuinut pingaaruteqarlunittaaq. 

-Uatsinnut TELE-POST-imi sulisuusunut nunatsinni timersornermut piukkunnartunut qaffasissumillu timersortartunut tulluusimaarutigisinnaasatsinnut tapiissuteqartuuneq pingaaruteqarportaaq, taakkumi nunatsinni meeqqanut inuusuttunullu maligassiuisuummata. Taamaattumillu anguniakkami tungaannut siuarsarsinaaneranni ikiuisinnaanerput nuannaarutigaarput.

TELE-POST 2016-imili ESG-mik tunuliaqutsiilluni aningaasaliisartuuvoq maannalu suleqatigiinnerup ukiumik sivitsornera 2022-imi isumaqatiginninniutigineqaqqittussaavoq.

Annertunerusunik paasiniaajumasut saaffigissavaat Elite Sport Greenlandimi siunnersorti Muusaarannguaq Ostermann-Søholm uku aqqutigalugit muusa@elitesport.gl / +299 348152 imaluunniit TELE-POST-imi saaffigalugu avammut tusagassiisarnermut pisortaq Julie Rademacher +299 263535.