Menu

TELE-POST frimærkinik nutaanik arfineq pingasunik ullumikkut saqqummiivoq

22/10/2018 - 12:30

UNESCO-p qanittukkut Kalaallit Nunaata Kujataani nuna nunalerinermut kulturimullu tunngassutilik eriagisassatut kingornussassanut allattorsimaffimmut ilanngutitippaa. Tamanna malunnartissavarput ukiuni qulikkaani Kujataani inuusimasup najugaqarsimasullu ataqqineqarluarluni eqqumiitsuliortup Aka Høeghip kusanaqisumik frimærkiliaanik.

Eqqumiitsuliortup Camilla Nielsenip assilialiat katillutik arfiniliusut suliarai, taakkulu takutippaat Kalaallit Nunaanni nipilersornikkut ukiut ingerlatsiviusut arfinillit. Nangeqattaartuni frimærkit kingulliit pingasut ullumikkut saqqummiunneqarput.

”Kalaallit Nunaat Sorsunnersuit aappaata nalaani” nangeqattaartuliatta annertuup 2016-imi aallartittup qulequtaraa. Naja Rosing-Asvidip sorsunnersuaq kalaallit isaannit isigalugu assilialiaraa. Nangeqattaartut frimærkitaasa tallimassaannut arfinilissaannullu killippugut.

Juullip frimærkii tipigissut
Frimærkit nutaat TELE-POST-ip ullumikkut nioqqutigiligaasa akornanniipput ukioq manna juullip frimærkii marluk, taakkulu pillugit annerusumik  atuarsinnaavutit uani.

Frimærkinik katersisartut nuannarinnittullu aammattaaq ukiup mappea nuannarineqartartoq pisiarisinnaavaat, taassumalu imarai frimærkit 24-it ataasiakkaarlugit ilanngussat aammalu miniarkit arfinillit 2018-imi saqqummiunneqarsimasut.

Frimærkit takukkit uani