Menu

TELE-POST-imi Nunarsuarmut anguniakkat uagut ulluinnatsinnut ilanngunnera

25/09/2019 - 17:41
CEO Kristian Reinert Davidsen i workshop med ledere
Nunarsuarmi Issittoq maanna isiginiarneqarpoq – Inuusuttut Nalagaaffiit Peqatigiit Ataatsimeersuarneranni nunarsuarmut oqariartuutigaat, maannakkut iliuuseqanngikkutta, taava kinguaarit tulliit uatsinnit sumiginnarneqassasut. Suliffeqarfittut inuusuttut suaartaataat tusarpagut maannakkullu iliuuseqarluta. TELE-POST-imi maluginiarneqarpoq nunarsuarmi Kalaallit Nunaat tusaamaneqalersimasoq aammalu inuusuttut silap pissusaa pillugu akerliunerminnik takutitsisalersimasut nunarsuullu siunissaa sorsuutigigaat.

TELE-POST-imi aqutsisut tamarmik ullumikkut katersuupput nunarsuarmut anguniakkat ulluinnatsinnut ilanngunnissaat pillugu:

”Kinguaariit tulliit, siunissami sulisoriligassatta, akisussaaffiginerannut, pinngortitap aammalu nunarsuarmi tamarmi maanilu najukkatsinni nungusaataanngitsumik ineriartortitsinerup peqataaffiginissaat, TELE-POST-imit kissaatigineqarpoq. Suliffeqarfittut siunissatsinnut aammalu niuernitsinnut, nunatsinni inunnik avatangiisimillu qanoq ittunik peqatigiilluta pilersitsinerput apeqqutaavoq, Kalaallillu Nunaat nunarsuarmit sunnerneqarpoq. Taamaattumik akisussaaffimmik aamma tigusisariaqarpugut, nunarsuarmullu anguniakkat TELE-POST-imi maanna ulluinnatsinnut ilanngunnialerpagut”, pisortaaneq Kristian Reinert Davidsen oqarpoq.

TELE-POST-ip suliffeqarfittut nutaamik ukkatarilerpai CSR aammalu Nalaagaaffiit Peqatigiit nunarsuarmut anguniagaat. Aqutsisorpassuit ullumikkut seminareqartinniarlugit katersorsimavagut, robottillu atorlugit suleqatigiinneq (team-building) sungiusarparput, immikkoortortaqarfiillu akimorlugit isumassarsiatsialannik allattuivugut, suleqatigiinnerummi sunneeqatigiinneq pilersittaraa upperaarput.

”TELE-POST-imi ataqatigiissitsisuuvoq attaveqaasersuisuullunilu, tamakkumi pingaarutilimmik inissisimapput siunissami inuiaqatigiit nungusaataanngitsumik ingerlanissaannut. Naalagaaffiit Peqatigiit nunarsuarmut anguniagaannik suliffeqarfiup suliaanut ilanngutsitsinissap anguniarnerani, suliffeqarfitsinni aammalu suleqatigisatsinnut, soorlu kommunenut aammalu suliffeqarfinnut allanut, nungusaataanngitsumik ingerlatsinissamut tunngatillugu assigiimmik anguniagaqarnissap pilersinnissaa anguniarneqarpoq”, Sulisoqarnermut immikkoortortaqarfimmut pisortaq Helena Rotvig Kristiansen oqarpoq.

Ulluni makkunani aqutsisunik ulluni marlunni seminareqartitsisoqarpoq, peqataasullu tamarmik Naalagaaffiit Peqatigiit nunarsuarmut anguniagaannik suliaqarnermut peqataassapput.

Seminareqarnermi workshoppeqarnerup nalaani TELE-POST-imit peqataasut isumassarsiaasa ilaat tassaavoq, mingutsitsinngitsumik nukissiuuteqarneq, suliffeqarfiullu ikummatissanik mingutsitsisunik atuinermik annikillisaaneq peqataaffigissagaa isumassarsiaavoq, meeqqat mikineriniilli pitsaassutsimik ilinniartinneqartarnissaannik ukkataqarnissaq kiissalu suliffeqarfimmi pappiaqqanik atuinerup annikillisarneqarnissaanik siunertaqarnissaq.

Nunarsuarmut anguniakkat nungusaataanngitsumik suliaqarnitsinnut aammalu allannguinissamik suliaqarnitta isumatsinniitinneranik annertusisitsineq, aammalu tamakku qanoq naleqartiginerannik paasinninneq, sakkussatta ilagissavaat. Nunarsuarmut anguniakkat, ukkatarinninnitta sakkortusinissaanut kiisalu siunertap nunarsuup sinneranit paasineqarnissaanut, ikiussavaatigut. Nunarsuaq tamakkerlugu anguniakkat assigiiupput, peqqinnissamiit atugarissaarnermut, taavalu akisussaassusilimmik atuinermiit naligiissitaanermut kiisalu qulequttat allarpassuit.

Nungusaataanngitsumik ineriartortitsinermik Naalagaaffiit Peqatigiit Nunarsuarmut anguniagaat 2015-imi atuutilerput, 2030-llu tungaanut inunnut aammalu avatangiisimut pitsaanerusumik ajunnginnerusumillu ineriartortitsinissamik sammiveqartinneqassapput.

Allanik paasisaqarumagaanni imaluunniit apeqqutissaqaraanni attaveqaqatigiinnermut pisortaq Julie Rademacher mailimut uunga julie@telepost.gl-imut imaluunniit mobil +299 263535-imut attavigineqarsinnaavoq.