Menu

TELE-POST-imit angerlarsimaffeqanngitsunut 150.000 kr.-it

24/11/2016 - 16:06

Ullumi frimærkip tapiliutitallip tuniniarneqarneranit sinneqartoorutit TELE-POST-imit angerlarsimaffeqanngitsunut suliniutinut atugassatut agguaanneqarput.

Suliffeqarfiup maanna check-init marlunnik 75.000 kr.-inik aningaasartaqartunik angerlarsimaffeqanngitsut pillugit Nuummi suliniaqatigiiffinnut tunniussimalerpai. Tunineqartut taassaapput Cafe Kialaarfik/ unnuisarfik aamma peqatigiiffik NoINI. Aningaasat tunniunneqartut frimærkimit tapiliutitalimmit 2014-mi januaarimi saqqummersup tuniniarneqarneraniit sinneqartoorutaapput. Frimærki tapiliutitalik taanna ukiut pingasut ingerlanerani tunisaalluarsimavoq.

TELE-POST-ip attaveqaqatigiinnermut pisortaa, Arnakkuluk Jo Kleist, ima oqaaseqarpoq:

- Ukiut tamaasa TELE-POST-i inuiaqatigiinni suliniutinut pitsaasunut tapersersuinissamut atugassamik frimærkimik saqqummersitsisarpoq. Suliffeqarfitsinnut tamanna pingaaruteqartorujussuuvoq, tassami atuisugut sinnerlugit inuiaqatigiinni tapersersortariallit peqataaffiginissaannut akisussaaqataanerput ilisimaaralugu saqqummersittaratsigu. 

Ineriartornermut aqutsisoq Allan Pertti Frandsen, ima ilassuteqarpoq:

- TELE-POST-imi inuiaqatigiinni akisussaaqataanerput pingaarutilik ilisimaaralugu ukiut tamaasa frimærkimik tapiliutitalimmik saqqummersitsisarnerput ingerlatiinnarparput. Assut kissaammernarpoq inuit taama amerlatigisut, nunatta avataaniikkunik iluaniikkunilluunniiit, frimærki tapiliutitalik pisiarisarmassuk. Frimærkinik tapiliutitalinnik tuniniaaneq taama annertutigisumik isertitaqarfiunera tulluusimaarnanngitsuunngilaq.

Frimærki tapiliutitalik pillugu

Eqqumiitsuliortup Niels ”Mo” Motzfeldt-ip frimærki tapiliutitalik kingulleq suliaraa.

Paasissutissat annertunerusut pissarsiariumagaanni ineriartornermut aqutsisoq Allan Pertti Frandsen attavigineqarsinnaavoq +45 61393065-imut sianernikkut imal. apf@telepost.gl–imut allannikkut. Attaveqaqatigiinnermut pisortaq Arnakkuluk Jo Kleist +299 547854-mut sianerluni og ajk@telepost.gl –mulluunniit allannikkut aamma attavigineqarsinnaavoq.