Menu

TELE-POST-imit nukissaq minguitsoq misilerarneqarpoq

12/07/2019 - 08:30

TELE-POST-imit kissaatigineqarpoq sakkortusaaviit atajuaannartumik nukissiamik atuinerulernissaat aamma ingerlatsinermi isumalluutit sipaarneruneqarnissaat.

Taamaattumik maannakkut TELE-POST anorisaatinik atuinermik misilittaavoq.

Nunatsinni sineriak sinerlugu sakkortusaaveqarfinnik 50 missaanniittunik peqarpoq, taakkua illoqarfinnut aamma nunaqarfinnut amerlanernut internetimut attaveqarnissaq qulakkeerpaat. Ullumikkut TELE-POST-imit aningaasat amerlasuut helikopterinik attartornermut atorneqartarput, sakkortusaaveqarfinni tankit orsersorniarlugit sulisut angalatinneqartarmata.

Anorisaat maannakkorpiaq misilerarneqartoq Nuup kujataani Meqquitsumi, Skindhvalenimi sakkortusaavimmi innissisimavoq, Anguniarneqarpoq anorisaatip nukissiamik naammattumik pilersuisinnaanissaa, taamaalilluni sakkortusaavik atuinermi pingajorarterutaata aappaanik atuinikinnerulersinnaalluni aamma tamatumunnga ilutigitillugu silaannarmik mingutitsinnginnerusumik atuinissaq qulakkeerneqarluni.

- Anorisaammik misilittaaneq ajunngitsumik ingerlappat uagut anguniarparput Kalaallit Nunaani sumiiffinni arlalinni anorisaatinik peqalernissaa. Taamaaliornitsigut pinngortitarput pinnersorsuaq pitsaanerusumik paarissavarput aamma suliffeqarfimmut silaannaap pissusianut tunngatillugu aningaasanik sipaarluta. Taamaattumik misilittaanerup taassuma malinnaaffiginissaa pissangassutigaarput, Teknikimut IT-mullu pisortaq Jonas Hasselriis oqarpoq.

Ullumikkut TELE-POST sakkortusaavii 96 %-ii seqerngup qinngornerinik katersisaatinik peqarpoq. Seqerngup qinngornerinik katersisaatit aasaanerani nukissiamik annertujaartumik pilersitsisarput, aammali ukiuunerani nukissiaq minguitsoq annikinnerulersarluni. Taamaattumik  TELE-POST-imit neriuutigineqarpoq nukissiamik minguitsumik nioqqutissiornerup ukiuunerani atatiinnarneqarnissaa anorisaatit iluaqutigalugit. 

- Anorisaatit misilittarnerisigut qulakkeerparput anorip sakkortuup aamma silap pissusiata peqqarniitsup akiorneqarsinnaanera, annertunerusumik aningaasaliissuteqartinnata aamma sakkortusaaveqarfinnut ingerlatsinermut aamma nukissiamik pilersuinermut sunniuteqanngitsumik, suliamut aqutsisoq John Pedersen oqarpoq.  

Paasissutissat:

- Anorisaatip TELE-POST misileragaa Sikuiuitsumi Kujallermi aamma Svalbardimi issittup silaannaani misilerarneqareerpoq.

- Anorisaatit anorip sakkortussusia 70 m/s akiorsinnaavaa.

- Anorisaat agguaqatigiissitsilluni ukiumut 7000 kWh-mit 6 m/s-mik anoreqarnerani nioqqutissiorsinnaavoq.

 

Apeqqutissaqaruit attaveqaqatigiinnermut immikkoortortaqarfimmi sulisoq Paarnaq Hansen saaffigiuk, mail panah@telepost.gl imaluuniit oqarasuaatitigut +299 563376