Menu

TELE-POST-ip 2021-p ingerlanerani frimærkit nutaat 24-t saqqummiutissavai

11/01/2021 - 09:14

Frimærkit Kalaallit Nunaanneersut mikisunnguit tulluusimaarutissallu nunatta immikkuullarissumik piorsarsimassusaanut, pinngortitaanut oqaluttuassartaanullu uppernarsaataapput. Taamaappoq frimærkiliagut siullerpaat 1938-mili naqiterneqarmatali. Qulequttat soqutiginartorpassuit ilamininngui 2021-p ingerlanerani frimærkiliatigut takutinneqartussat aajuku.

Frimærkip nalinganut ilassut 2021

Danmarkimi kalaallit illui sisamaasut Kalaallit Nunaannik ilisimasaqarnerulernissap siammarneqarnissaa pillugu kiisalu kalaallit Danmarkimi najugallit pillugit annertoorsuarmik suliaqarput. Taamaattumik Aalborgimi, Århusimi, Odensemi Københavnimilu kalaallit illui sisamaasut taakku ataatsimut tigusisussanngortinneqarput ukioq manna frimærkip nalinganut ilassutitut frimærkiliap tunineqarnerani isertinneqartunik. Frimærki ulloq 28. februaari saqqummiunneqassaaq.

Hans Egedep nunatsinnut tikinneranit kristumiussutsillu eqquteqqinneqarneranit ukiut 300-nngornerat

Ajoqersuiartortitap Hans Egedep Kalaallit Nunaannut tikinneranit ukiut 300-nngornerat kristumiussutsillu Kalaallit Nunaannut eqquteqqinneqarneranit ukiut 300-nngornerat, frimærkinik marlunnik miniarkimillu kusanaqisumik ataatsimik juunip arfineq-pingajuani saqqummiunneqartussanik malunnartissavagut.

Kalaallit Nunaanni Street Art

Inuusuttut eqqumiitsuliortut ukiut kingulliit ingerlaneranni Kalaallit Nunaanni sumiiffinni assigiinngitsuni illulianik assigisaannillu eqqumiitsuliaminnik nutaalianik pinnersaasarput. Tamanna malunnartissavarput frimærkinik kusanarluinnartunik arlalinnik, taakkunanngalu siulliit marluk saqqummiutissavagut ulloq 9. novembari.

Juullip frimærkia allatulaaq ittoq

2018-imi juullip frimærkia tipigissaatitaligaavoq 2019-imilu qaammartittagaqarluni. 2021-mi juullip frimærkii gimmick-iligaassapput, taannalu ukiamut saqqummiunneqarumaarpoq. Ukioq manna juullip frimærkii marluk aammattaaq saummiunneqassapput ulloq 9. novembari.

Kalaallit Nunaata frimærkii pillugit allanik atuarit nittartakkatsinn https://www.stamps.gl/information/frimaerkeprogram-2021 -imi, tassani 2020-mi frimærkinut programmi tamarmi aaneqarsinnaavoq.

Allanik paasisaqarumaguit frimærkinut pisortaq Allan Pertti Frandsen attavigiuk, apf@telepost.gl, tlf. +45 61 39 30 65.