Menu

TELE-POST-ip immap naqqatigoortumik kabelimik iluarsaassinini unitsikkallarpaa

10/04/2019 - 16:07

Sila sarfarlu pissutaallutik Kujataani Avannaanilu umiarsuaq immap naqqatigoortumik kabelimik iluarsaassigaluartoq iluarsaassisinnaanngikkallarpoq, Canadamullu uterallartariaqarluni.  Piffissap kingulliup ingerlanerani umiarsuarmiittut iluarsaassisussat Qaqortup avannaatungaani iluarsaasseriartarsimagaluarput uniinnartariaqarsimallutilli silarlunnera pissutigalugu. Silarlummik nalaanneqarneq pissutaalluni iluarsaassiniarneq imaannaasimanngilaq aamma iluarsaasseriartaraluarnerni atortut pingaarutillit ajoraluartumik kivisoorneqartarsimapput.

Umiarsuaq iluarsaassiniaraluartoq allatut ajornartumik St. Johnsimut utertariaqalersimavoq, tassani atortut annaasat taartissaat nutaat pissarsiarineqassammata umiarsuullu inuttai taarserneqarlutik.

- Nunatta kujataani avannaanilu atuisutsinnut tamanna uggornarluinnarpoq utaqqigaluarmassummi naliginnaasumik attaveqaqqilernissartik. Pisariaqartippagulli silaqqik iluarsaassinermilu sakkut eqqortut aamma kujataani sila ajormat allamillu periarfissaqannginnatta umiarsuaq Canadamut uterallartariaqarsimavoq. Umiarsuup sapinngisamik sukkanerpaamik uteqqinnissaa siunertaraarput kujataani avannaanilu iluarsagassat sapinngisami iluarsigasuarneqarniassammata, taama oqarpoq pisortaaneq Kristian Reinert Davidsen.

Piffissamut pilersaarut

TELE-POST immikkut ilisimasallit avataaneersut suleqatigalugit immap naqqatigoortup kabelip iluarsaannissaanut nutaamik piffissalersuilluni pilersaarusiussaaq. Immikkoortuni sullivigineqartuni sikup qanoq innera silallu qanoq innera tunngavigalugit TELE-POST piffissalersuissaaq. Tamanna pillugu TELE-POST kingusinnerusukkut nalunaaruteqarumaarpoq.

Angerlarsimaffimmi Internetti

Umiarsuup immap naqqatigoortumik kabelimik iluarsaassinerata nalaani Kujataani atuisartunut aqqutit qamikkallarneqarnikuupput. Immallu naqqatigoortumik kabelimik iluarsaassineq unitsikkallarneqarmat TELE-POST-ip Islandip tungaanoortoq immap naqqatigoortoq kabeli attavilerallarsinnaalerpaa. TELE-POST-imi atuisut inuinnaat taamaattumik naatsorsuutigisinnaavaat ullumi pingasunngornermi aprilip ulluisa qulinganni unnugumiit internettimut attaveqaqqilernissartik.