Menu

TELE-POST-ip Kangerlussuarmi Extreme E-toqarnissaanut SITE-mik angallattakkamik attaviliissaaq

06/07/2021 - 11:06

TELE-POST immikkut ittumik sukkaniuttoqarnissaanut site-mik angallattakkamik attaviliissaaq

Ukioq ataaseq qaangiuppoq Qeqqata Kommuniani bogmesterip Malik Berthelsenip aamma TELE-POSTimi pisortap, Kristian Reinert Davidsenip, Kangerlussuup eqqaani suleqatigiinnissamut periarfissanik misissuillutik naapinneraniit.

Ukioq ataaseq qaangiuppoq Exteme E-p Kalaallit Nunaannukarnissaat isumassarsiaannaammat upperiuminaatsoq. Ukioq manna aggustimi tamanna piviusunngussaaq, Qeqqata Kommuniata TELE-POST-illu suleqatigiilluarnerat ataqatigiissaarinerallu pitsaasoq iluaqutigalugu.

TELE-POST attaviliissaaq, motorsportinik nuannarisallit, TV-kkut internettikkullu nunarsuaq tamakkerlugu Extreme E-mi biilit innaallagiatortut sukkanniutilerpata isiginnaaqataasinnaaniassammata. Pisoq nunarsuaq tamakkerlugu nalunnginneqartoq siullermeerluni Kangerlussuup sioraani, Russell Gletsjeri isikkivigalugu Kalaallit Nunaanni 28. – 29. august 2021, toqqaannartumik ingerlanneqassaaq. TELE-POST-ip attaviit isumagissavai, sitemik angallattakkamik nappaanikkut, sumiiffimmi utaqqiisaarutaasumik 4G-mik atorsinnaalersitsisumik. Site angallattagaq maanna misilittarneqaleruttorpoq, attaviillu Russell Gletsjerip eqqaani sioqqani sukkaniunnerup aallakaatinnissaanut piareersimasussaapput.

TELE-POST-imi pisortaq, Kristian Reinert Davidsen oqarpoq:

- Inunnut amerlasuunut mobilikkut internettikkullu attaviit silaannarmiit tigusariaannaasarput, kisianni Issittumi alutornartorsuarmi mobilikkut internettikkullu attaveqassagaanni qaqqani portusuuni, qooqquni itisuuni kangerlunnilu telekkut atortulersuutit pisariaqartinneqarput. Tulluusimaarutigaara TELE-POST-ip Qeqqatalu Kommuneata suleqatigiilluarnerat pitsaasumik, pisussamullu Kalaallit Nunaannut pingaarutilimmut angusaqarfiummat.

Extreme E-mi sukkaniunneq silallu pissusaata allanngoriartornera

Extreme E tassaavoq aqqusernit avataatigut, SUV-nik innaallagiatortunik teknologiinillu nutaaliaalluinnartunik atuilluni, nunarsuarmi sumiiffinni sakkortunerpaani sukkaniunneq.

Sukkaniunnerup siunertaraa silap pissusaata allanngoriartorneranik, taassumalu kingunerinik ukkatarinninnissaq. Extreme E nunarsuarmi ornitassani tallimani, silap pissusaata allanngoriartornerinit sunnerneqarnerpaani sukkaniutsitsissaaq, takutinniarneqarlutik inoqajuitsut alliartorneri, immap qaffakkiartornera, Issittoq, kiattup orpippassui sikullu iigartartup aakkiartornera. Sermersuaq aakkiartortoq tunuliaqutitsialaavoq, silap kiatsikkiartornera pillugu oqariartuutinik annissinissamut.

Periutsimut nutaamut ’docu-sport’-imut soqutiginninneq angivoq. Tassaani takutinniarneqarput bilsport/sukkaniunneq, silap pissusaata allanngoriartorneranit sunniutit annertuut pillugit piviusulersaarummik ilallugu. Saniatigut Kangerlussuaq Kalaallillu Nunaat takornarianut ornitassatut immikkuullarilluinnartutut takutinneqassaaq.

Qeqqata Kommunia TELE-POST-imut suleqatigiilluarnermut qujassuteqarpoq

Qeqqata Kommuniani Borgmesteri, Malik Berthelsen oqarpoq:

-TELE-POST-imik qanimut suleqateqarneq assorsuaq nuannaraarput. Aallaqaataaniilli pitsaasuusimavoq, suliniutillu immikkuullarissup naammassilluarnissaanut angusaqarnissamut tunngasuusimalluni. Sitemik angallattakkamik nappaanerup Kangerlussuarmiit nunarsuaq tamakkerlugu Extreme E-mik toqqaannartumik aallakaatitsinissamik isumannaarissaaq. Neriuppugut sukkaniuttartut nunarsuarmi tusaamasat Kangerlussuup, Qeqqata Kommuneata nunattalu alutornartorsuup nittarsaannissaanut peqataajumaartut.

SITE angallattagaq, sukkaniunnermit toqqaannartumik aallakaatitsinissamut qulakkeerivoq
 Tusass Mobilimut site angallattagaq, mobilimut ingarlaannartumik attavinissinnaasumik, annerusumillu piginnaasalimmik atorfissaqartitsinermi atorneqartarpoq. Angallattagaagaluartoq atornissaanut TELE-POST-i annertuumik pilersaarusioqqaartariaqartarpoq. TELE-POST-immi signalimik eqqortumik, radiokædekkut attaviit arlallit atorlugit ingerlaartitsinissaq, atortunillu ikkussuinissaq isumagisussaavai. Teleteknikerit arlallit atortunik ikkussuinermi, ikiuutit oqimaatsut atorlugit ingerlataqarsimapput, ATV-t atorlugit assartuinikkut, qaqqallu qaavini, Issittumi naggorluttumi ikkussuinikkut.