Menu

TELE-POST: Nunaqarfinni Tusassillit amerlanerit 2020-milu ukiup affaani naatsorsuutini angusarissaarneq

08/10/2020 - 13:44

Naak Covid-19 atuukkaluartoq, 2020-mi ukiup affaani siullermi akileraarutit suli ilanngaatiginagit TELE-POST naatsorsuutimini  64,7 mio. kr.-inik angusarissaarpoq. Angusat siorna 2019-imi ukiup affaani siullermi angusanut sanilliullutik 15,5 mio.kr.-inik amerlanerupput siornami imaatigut kabelimik aaqqissuussineq qaavatigut aningaasartuuteqartitsisimammat.

TELE-POST COVID-19-imit aamma sunnerneqarpoq

Covid-19 2020-p aallartinnerani Nunarsuarmi tamarmi atugaalerpoq, TELE-POST-ilu tamatuminnga aamma sunnerneqarpoq. Tamanna pingaartumik nunani allani sullitat roamingimik atuinerannit isertitakinnerusimanerup takutippaa, taamaattorli tamanna allaffissornermi aningaasartuutinik sipaarniuteqarnikkut naligiisinneqarpoq. Covid-19-ip ajornartorsiortitsinerata TELE-POST-imik eqquinerlunneri pingaartumik tassaasimapput nunani tamalaani pilersuisorisat kinguaattoortarneri kiisalu allakkanik nassiussanillu kinguaattoortoqartarnera.

Upernaaq akikillisaaneq nunaqarfinni sullitat amerlinerannik kinguneqarpoq

TELE-POSTi Tusass internettimik nioqqutit akiinik maajimi 27 %-it angullugit akikilliliivoq. Akikinnerulersitsineq sullitanit assut tigulluarneqarsimavoq. Akinik appaasoqareersorlu pingaartumik nunaqarfinni sullitat amerleriarujussuarput. 2019-ip aallartinnerani nunaqarfinni Tusass Flatrate internetimik atuisut 34%-iusimasut ullumikkut 47%-inngorsimapput. 

TELE-POST-ip siulersuisuni siulittaasoq Stine Bosse aqutsisunut sulisunullu angusarissaarneq pillugu qutsaviginnippoq: 

-Suliamik pimoorussiuarnikkut, pisariillisaanikkut attaveqaatinullu pitsaanerusunut aningaasaliissuteqarnikkut TELE-POST-ip nioqqutaanik akikinnerulersitsisoqarsinnaasimavoq, internetsi amerlanernut periarfissaalersoq malunnavissumik pitsaanerulerpoq. Nioqqotinik Tusassinik nutaanik pilerinarluartunik illoqarfinni pingaartumillu nunaqarfinni atuisut malunnaatilimmik amerleriarput. Digitalinngorsaanermik sukkalisitsisumik nunamut tamarmut nioqqutinik amerlanernik neqerooruteqarsinnaanerput tulluusimaarutigaarput. 

TELE-POST-ip ukiumut naatsorsuutimini angusarissaarnissani naatsorsuutigaa

TELEPOST nunarsuup sinneranisulli Coved-19-imik suli sunnertisimavoq, taamaattorli ingerlatseqatigiiffinnut allanut naleqqiulluni sakkukinnerusumik sunnigaangaluartoq TELE-POST-imi sulisut nassiussat qulakkeerniarlugit ilungersorlutik sulipput, nalunaarasuartaateqarnikkut attaveqaateqarneq annertusarlugulu aserfallatsaaliorneqarsinnaaqqullugu. TELE-POST-ip pisortaanerata Kristian Reinert Davidsenip COVID-19-ip unammillernartui ima oqaluttuarai: 

-COVID-19-imit eqqugaasimanerput assersuuteqarfigissagaanni, taava sullissatta ilaasa modeminik tikittoornissatsinnik maannakkorpiaq ajornartorsiuteqarnerput misigaat. Tamanna unammillernartoq sullissatta iluaqutissaannik aaqqiiviginiarlugu ilungersorluta maanna sulivugut,  taamaattorli aamma paasisariaqarput nunarsuarmi arlaannattaluunniit siulittuuteqarfigisinnaanngisaanik immikkut illuinnartumik maanna inissisimanerput, uagullu ilungersuutigaarput taamatut pisoqaqqinnginnissaa. 

Naak COVID-19 atuukkaluartoq, 2020-mut ukiumut naatsorsuutini 100-120 mio. kr.-inik angusaqarluarnissani TELE-POST-ip naatsorsuutigaa.

Paasisaqarnerorusunnermi attavigisassaq: TELE-POSTimi attaveqaqatigiinnnermut pisortaq Julie Rademacher, oqarasuaat 263535, email: julie@telepost.gl