Menu

TELE-POST sunniuteqarluarneruvoq unammillersinnaanerullunilu

03/10/2017 - 11:45

Ukiup 2017-ip affaani siullermi naatsorsuutit takutippaat TELE-POST sunniuteqarluarnerulersimasoq aamma sullitat akiliutigisaminnit annertunerusumik pissarsiaqartartut.

TELE-POSTip iliuusissatut pilersaarutaani 2017-2020 pineqarpoq nioqqutinik nutaanik pilersuineq aamma sullitat pitsaanerusumik misigisaqartarnissaat, taamatuttaaq attaveqaatit pitsanngorsarnissaat tamatuminnga piviusunngortitsinissamut. TELE-POSTip tamanna annertuumik sulissutigaa ukiullu affaanut naatsorsuutini tamanna maannakkut malunniuppoq. TELE-POST 2017-imi ukiup affaani siullermi naatsorsuutitigut angusarai akileraaruteqannginnermi 78,2 mio. koruunit 2016-imi 60,5 mio. koruuniusimallutik, naak ilanngaaseereerluni kaaviiaartitsineq 13,1 mio. koruuninit appariarluni 418,5 mio. koruuninik annertussuseqartoq.

- Siulersuisuni nuannaarutigaarput iliuusissatut pilersaarutip maannakkut angusaqarnernik takutitsisinnaalernera, sullittakkanut aamma inuiaqatigiinnut kalaallinut, piginnittuusunut. Ineriartortitsineq aamma iliuutsinik nutaanik piviusunngortitsisarnerput suli naammassinngilarput, kisianni angujartorluarparput, siulersuisuni siulittaasoq Stine Bosse oqarpoq.

TELE-POST qajannaannerulerpoq aamma sunniuteqarluarnerulerluni, tamanna EBITDA killiussami takuneqarsinnaavoq 1 %-pointimik qaffassimaneratigut, tassa siornamut sanilliussilluni naak kaaviiaartitsineq apparsimagaluartoq. Decembari 2016-imi mobilinut abonnement Tusass Plus saqqummiunneqarpoq, ukiullu affaata ingerlannerani Tusassa Plus-imik atuisut 10.000-it aningaasat atukkatik pissarsiaqaatigineruvaat. Tamakku tamarmik pilersaarummut ilaapput maannakkullu aammattaaq naatsorsuutini takuneqarsinnaalerput, mobiltelefoninik atuinermi kaaviiaartitsinerup apparneranut pissutaaqataasutut.

- Ukiup affaa assut ulapiffiusimavoq siunissamut pilersaarutitut anguniakkavut anguniarlugit ulapissimaqigatta. Annertuunik aningaasaliissuteqarsimavugut ilaatigut imaatigut kabelimut aamma sullitavut pitsaanerusunik nioqquteqarfigisinnaalerlugit. Tamatuma pisortaanertut tulluusimaartippaanga, Kristian Reinert Davidsen oqarpoq.

2017-imi suliniutit annertuut aallartinneqarput TELE-POSTip attaveqaatai pitsanngorsarniarlugit, taamaaliornikkut sullittakkat attaveqarsinnaanermik pitsaanerusumik pissarsiniassammata. Taamaalilluni 2017-imi ukiup affaani siullermi 135 mio. koruunit aningaasaliissutigineqarput, 2016-imi piffissami tamatumani 11 mio. koruunit atorneqarsimallutik.

TELE-POSTip iliuusissatut pilersaarutaa 2017-2020: https://telepost.gl/sites/default/files/tele-post_periusissiaq_17-20.pdf

TELE-POST ukiup affaanut nalunaarusiaq: https://telepost.gl/sites/default/files/halvaarsrapport_2017.pdf