Menu

TELE-POST ukiumut pitsaalluinnartumik angusaqaqqippoq

22/04/2021 - 13:02

TELE-POSTi 2020-mi akileraarutit ilangaatigereerlugit ukiumut 122,7 mio. kr.-inik angusaqarpoq, tassa 2019-imi angusarineqarsimasunit 1 mio. kr.-inik amerlanerusunik. Tamatumani ingerlatseqatigiiffinnut akileraartitsisarnermik allannguisimaneq akileraarutit ilanngaatigereerlugit angusamut taamaalilluni sunniuteqarluarpoq. Kaaviiaartitat ilanngaaseriikkat 12 mio. kr.-inik appariaateqarsimapput, tassa 814,2 mio. kr.-iniit 802,2 mio. kr.-inut.

-Ukiumut angusaq ukiunut sisamanut periusissiorfiusunut kusanartumik naggasiineruvoq, naak imaatigut kabelimik ajutoornerit, sila ilungersunartorsiortitsisartoq minnerunngitsumillu Covid-19 ajornartorsiortitsigaluartoq TELE-POSTi suliffeqarfinngortinnissaasimavarput naammassisaqarfiulluartoq. Attaveqaqatigiinnermik qajannaannerusumik nioqqutinillu ineriartornermut naleqqunnerusunik akikinnerusunillu pilersitsisimavagut. Ingerlatseqatigiiffik ukiuni kingullerni tulluusimaarnartorujussuarmik ineriartorsimavoq, 2020-milu angusaqarluartoqarneratigut siuariartorneq attanneqarpoq. Siulersuisuni siulittaasoq Stine Bosse taama oqarpoq. 

COVID-19

Covid-19 TELE-POSTimut aamma eqquisimavoq. Attaveqariaaseq Roaming aqqutigalugu atuisoqangitsoornerup* saniatigut TELE-POSTimi suliaqarfinni assigiinngitsuni sulianik annikilliliisoqartariaqarsimavoq Covid-19-ip ajornartorsiortitsineratigut killilersuisoqarnera peqqutigalugu, tamannalu nunatsinniinnaanngitsoq nunarsuarmili tamarmi atuuppoq. Tamanna arlalitsigut sipaarniarnermik nassataqartoq ukiumoortumik angusamut taamaattoq pitsaasumik kinguneqarpoq. TELE-POSTip 2020-mi ilikkakkani tunngavigalugit sipaakkat ilaannik atajuartussanngortitsisinnaanissani naatsorsuutigaa, allallu anguneqarumaarput siunissami killilersuisuerullunilu suliaqarnerit amerliartoqqilerpata.

Akinik appaaneq toraagaqarlunilu nioqqutit

TELE-POSTip 2020-mi internettimut akinik 27%-imik appaanera sullitatsinnit assut tigulluarneqarsimavoq. Tamanna internettimik annermik atuilersut amerlanerulersimanerannut takussutissaavoq. Tamatuma saniatigut illoqarfinni nunaqarfinnilu internettitaartartut amerlanerulersimapput.

2020-missaaq Tusass Meeqqanut 18-it inorlugit ukiulinnut atugassiaq nioqqutigineqalerpoq. Tusass Meeqqanut killeqanngitsumik oqaluussinermik, sms-sersinnaanermik 1 GB datamillu imaqartoq TELE-POSTip nioqqutaasa iluatsilluarnerpaat ilagaat.

-Nioqqutaalerneraniit qaammatip siulliup ingerlanerinnaani Tusass Meeqqanut-mik pisisut 3000-iupput. Tamananna meerartatta digitaliusunut tunngatillugu siuarsimanerujussuannik takutitsivoq. Tusass Meeqqanut aqqutigalugu meerartagut inuusuttuarartagullu amerlanerusut internettikkut, ilaquttanut ikinngutinullu attaveqarsinnaalernerat nuannaarutissaavoq, TELE-POSTip pisortaanera Kristian Reinert Davidsen taama oqarpoq.

Angusat pitsaasut Coding Classilu aqqutigalugu kinguaariinnut tullernut aningaasaliineq

-Ingerlatseqatigiiffik Namminersorlutik Oqartussanit pigineqartoq uatsitut angissusilik pitsaasumillu angusaqarfiusartoq inuiaqatigiinnut iluaqutaasussamik immikkut suliaqarnissamut pisussaaffeqarpoq. TELE-POSTimi inuiaqatigiinnut akisussaaqataanerput immikkut periuseqarluta suliniuteqarfigaarput, taamaalilluta ullumikkut suliniutitta inerneri siunissami iluanaarutaaleqqullugit, Stine Bosse naggasiivoq.

TELE-POSTip suliffeqarfiit inuiaqatigiinnut akisussaaqataanerat - CSR aqqutigalugu suliniutaasa ilagaat Coding Classitut taallugu Nunatsinni meeqqat atuarfianni 7. klasseni atuartunik kodiinermik IT-lerinermillu ilinniartitsisarneq. Tamatumani meeqqat teknologiimut soqutiginnittut amerlanerulernissaat taamaalillunilu inuusuttut ilinniakkanut tamakkununnga tunngasunut siunissami ilinniagaqalersartut amerlanerulernissaat siunertarineqarpoq. TELE-POSTimi inuusuttunik teknologiimut tunngasunik ilinniagalinnik amerlasuunik siunissami sulisoqalernissaq neriuutigineqarpoq.

TELE-POSTimi maajip 18-ianni ataatsimeersuartoqassaaq. 

* (nunani allani sullitat Kalaallit Nunaanni mobilimut atuisuussutsiminnik atuisut)  

Paasisaqarnerorusunnermi attavigisassaq: Tele Greenland A/S-imi Attaveqaqatigiinnermut pisortaq, Julie Rademacher Mobil +299 352626 Mail: julie@telepost.gl