Menu

TELE-POST ukiup ingerlanerani nipitittakkanik nutaanik 24-inik pilersitsissaaq

04/01/2019 - 13:30

Kalaallit allakkanut nipitsittagaat mikisuupput, mikigaluarlutilli nunatta kulturianik immikkuullarissuusumut, pinngortitaanik oqaluttuassartaanillu tulluusimaarnartumik saqqummiisuullutik. 1938-imili nipitittagaq siullerpaaq saqqummersikkatsiguli taamaattuarsimavoq. Sammisat assigiinngitsut ukiut ingerlaneranni saqqummerittarsimasatta ilaat maani takusinnaavatit, tamakkulu tassaapput ukiup ingerlanerani malunnartinniarneqarumaartut.

Ilassutit nalingat inunnik isumaginninnermut attuumassuteqartoq

Nipitittakkat tuniniarneranni ilassutinit isertinneqartut ukioq manna nunatsinni Frelsens Hærimut tunniunneqassapput. Nipitittakkamik taassuminnga pilersitsisimasoq tassaavoq Panínguak´ Kjærulff. Nipitittagaq januaarip ulluisa 21-ni saqqummissaaq.

Ukiuni qulini namminersorneq

Nunatta namminersortunngorneranit ukiut qulinngornerat nipitittakkamik kusanarluinnartumik malunnartinneqarumaarpoq, taannalu Aka Høegh-imit titartarneqarsimalluni. Nipitittagaq inuiattut ullorsiornitsinni saqqummerumaarpoq.

Unesco-p nunarsuarmi eriagisassatut kingornussassanngortitai

TELE-POST marloriarluni Nunatsinni sumiiffiit marluk Unesco-mit eriagiassanngortitaanerat malunnartinniarlugu nipitittakkanik saqqummiisareersimavoq. Taamatuttaarlu Aasivissuit-Nipisat tassunga ilanngutsinneqarnerat soorunalimi nipitittakkamik nutaamik pilersitsinikkut malunnartinneqarumaarpoq. Nipitittagaq kusanaqisoq Julie Edel Hardenberg-imit pilersinneqarsimavoq. Taanna aammattaaq juunip ulluisa 21-ni saqqummersinneqarumaarpoq.

Juullimi nipitittagaq nutaaliorfigineqartoq

Ukioq 2019-imi juullimi nipitittagassat marlunnik pioreersimasunik sammisaqarumaarput – nutaaliorfigineqassallutilli. Tamatuma saqqummiunnissaanut qilanaarpugut, tamannalu ukiariartulernierani piumaarpoq. Juullimi nipitittakkat oktoberip 21-ianni saqqummerumaarput.

Nunatta nipitittagai pillugit paasisaqarnerorusukkuit nittartagaq www.stamps.gl iserfigiuk, tassani 2019-imi nipitittagassat pilersaarusiorneqarnerat aasinnaavat.

Annertunerusumik paasisaqarnerorusukkuit nipitittagaqarnermi ittuusoq Allan Pertti Frandsen attaviginissaanut tikilluaqqusaavutit: apf@telepost.gl, tlf. +45 61 39 30 65.