Menu

TELE-POSTi Allakkerinermut nutaamik pisortassarsiussaaq

21/04/2021 - 15:30

Allakkerinermut pisortaq, Per Svendsen atorfimminit apriilip naanerani soraartussanngormat TELE-POSTi Allakkerinermut nutaamik pisortassarsiorpoq. Pisortap soraarnera TELE-POST-imut piffissamut periusissiorfiusumut nutaamut pulasumut pissusissamisoortumik alloriarneruvoq.

TELE-POST-imi pisortaaneq Kristian Reinert Davidsen ima oqarpoq:

  • Ingerlatseqatigiiffik ukiuni kingullerni allanngoriartungaatsiarsimavoq. Maannakkut piffissamut nutaamut suliassanik nutaanik, ilaatigut internetikkut niuernermi periarfissanik pissanganartunik imalimmut pisimavugut.
  • Ilutigitillugu naqissuserusuppara Peeri allakkerinermut ukiorpassuarni sinniisutut aqutsisutullu assut nuannarisaasimammat. Allakkerinermut pisortaanermini suliffeqarfimmik ullumikkut tulluusimaarutigisatsinnik ineriartortitseqataasimavoq.
  • Sila qanoq ikkaluaraangat Peerip Allakkerinermut pisortatut nassiussassat apuuttarnissaat qulakkeertarsimavaa. Peerip allakkerinermut ukiut sullissiffigisimasai pillugit qutsavigaarput siunissamilu ajunnginnerpaamik kissaallugu.

Per Svendsen Kalaallit Nunaanni allakkeriveqarfimmi ukiut 30-t sinnerlugit atorfeqarsimavoq ukiunulu arlalinni Allakkerinermi pisortaasimalluni. Ukiuni taakkunani allakkat ikiliartuaarsinnarsimapput pingaartumik nalunaarasuartaateqarnikkut digitaalinngorsaaneq ilutigalugu.  

Sulisoqarnermut immikkoortortami pisortaq Helena Rotvig Kristiansen Allakkerinermut 1. maaji 2021-mi, nutaamik pisortartaarnissap tungaanut pisortaagallassaaq.