Menu

TELE-POSTimi internetsi akikinneq ukiumullu inernerusoq pitsaalluinnartoq

28/04/2020 - 15:07

TELE-POST siooranartunik nutaanik sillimaniarnermillu annerusumik atorfissaqartitsilersussaagaluarluni, suleqatigiilluarnikkut ingerlatseqatigiiffimmilu pitsanngorsaanikkut akileraarutit sioqqullugit ukiumut 120,1 mio.kr-inik angusaqartoq, internettimik akikinnerulersitsivoq.

Innuttaasunut internetsi akikinneq

Ukiumut angusap naammaginarluinnartup TELE-POST atuisunut internetsimik akikinnerungaatsiarmik pilersuisinnaalersippaa. Atuisut ataasiakkaat internetsikkut pisartagaat Tusass 30/5 maanna 25%-imik, tassa 1.199 kr.-miit 899 kr.-mut akikillineqarpoq. Tusassillu 10/2, 27%-mik akikillivoq 1.099 kr.-miit 799 kr.-mut akeqalerluni. Saniatigut internet minneq 2/1 qaammammut 499 kr.-lik 5/1-mut sukkatsinneqarpoq.

TELE-POSTip pisortaanera Kristian Reinert Davidsen ima nassuiaavoq:

- Kalaallit Nunaanni qaqqani meqquitsuni kangerlunnilu qinngortuuni telekkut attaveqaqatigiinnermut akisoqisumut annertuumik aningaasaliissuteqarsimavugut, innuttaasut 92%-iisa Tusass internettimik flatratemillu internetseqarnissamut periarfissikkumallugit. Nalunngilarput inuit amerlasuut digitalimik ineriartornermut peqataanissartik pingaartillugu namminneq aningaasartuutiminnut internetsi ilannguttaraat. Taamaattumik inuit amerlanerpaat ilaalernissaat sapinngisatsinnik suliniutigaarput. Internettip sullitatsinnut pingaaruteqarnerpaaffiani nuannaarutigaarput akit appartissinnaagatsigit internettilu sukkanerulersillugu.

Suliffeqarfinnut sullitanut isumannaallisaaneq pitsaanerusoq

Sullitagut suliffeqarfiit ukiuni kingullerni imaatigut kabilit ajutoornerannit arlaleriarlutik eqqugaasarsimasut qarasaasiakkut pinerlunniat siooratitsisarnerannik Coronamillu ajornartorsiornermik allannguillunnartumik aqqusaagaqarput. Suliffeqarfiit sullitatsinnut ataasiakkaanut sanilliullutik iluarsiissutinik pitsaasunik, piffissami siooranartut nutaat takkussuuffianni atorsinnaasumik pisariaqartitsilluinnartuupput. Taamaattumik TELE-POSTip suliassaanut pingaarnernut ilaavoq suliffeqarfinnut iluarsiissutinik tamakkiisumik isumannaatsunillu neqerooruteqarnissaq.

Coronamut atatillugu tapiissut immikkut iluaqutissatut ataatsimeersuarnissamut innersuussutigineqassaaq

Ingerlatseqatigiiffiup aningaasaqarnerata qajannaannera iluaqutigalugu, Coronamik ajornartorsiornerup inuiaqatigiinnut sunniutai killilersimaarniarlugit, TELE-POSTi immikkuullarissumik 25 mio. kr-nik iluaqutissanik piginnittunut – Namminersorlutik Oqartussanut tapiivoq. Siulersuisunut siulittaasoq Stine Bosse ima oqaaseqarpoq:

- Ukioq kingulleq imaatigut kabelinik ajutoorfiugaluartoq niuillaqqinnerup annertuumillu suliniuteqarnerup kinguneraa, Coronamik nalaatsinerlunnerup kinguneranik aningaasatigut ajutoornerit annikillisinniarlugit tunissuteqarsinnaasimaneq. Saniatigullu akikinnerusumik internetsimik neqerooruteqalerneq. Siulersuisut isumaqatigiillutik aalajangerput immikkuullarissumik iluaqutissanik 25 mio. kr.-inik tapiinissaq ataatsimeersuarnissami innersuussutigineqassaaq.

Coronap ajornartorsiortitsineranut atatillugu immikkuullarissumik iluaqutissatut innersuussutigineqartut, isumaqatigiissutaasut naapertorlugit iluaqutissanut ilanngullugit tunniunneqassapput, suliffeqarfiup ataatsimeersuarneranut siunnersuut Naalakkersuisunit akuerineqassappat.

Imaatigut kabelimik ajutoorneq iluaqutissallu

Siorna imaatigut kabelinik assingiinngitsunik pingasunik ajutoornerit pissutigalugit annertuumik sinneqartoornissaq TELE-POST-imit ilimagineqarsimanngikkaluarpoq. Ingerlatseqatigiiffimmili pisortat pitsanngorsaaneq iluaqutigalugu iliuusissatut pilersaarut pisariunngitsoq atuutilersissinnaasimavaat. Tamanna imaatigut kabilinik ajutoornerit aningaasaqarnermut sunniuteqapilunnissaraluannik killilersimaarinnissimavoq. Imaatigut kabilinik ajutoortunernik iluarsartuussineq akisusimagaluaqisoq ingerlatseqatigiiffik 2019-imi naammagisimaarnartorujussuarmik akileraarutit sioqqullugit 120,1 mio. kr.-inik sinneqartooruteqarpoq. 

Ingerlatseqatigiiffiup siorna internetsimik akikillissaanissani pilersaarutigisimagaluarpaa, imaatigulli kabilinik ajutoorneq peqqutigalugu ingerlatseqatigiiffik aalajangerpoq pilersaarutit kinguartinneqarallassasut iluarsaassinerit akiligassartaasa paasinissaasa tungaanut. Imaatigut kabilit iluarsarneri 2019-mi 53,9 mio. kr.-inik, tamakkiisumillu 71,6 mio. kr.-inik annaasaqarfiusimapput.

TELE-POSTip ataatsimut isumaqatigiissutaareersutut iluaqutissanik 87,6 mio.kr.-inik, taakkunanngalu 50 mio. kr.-inik immikkut iluaqutissanik tunniussaqarnissaa inuiaqatigiinnit attaveqaqatigiinnermut annertuumik aningaasaliissuteqarnermik peqquteqarpoq.

Namminersorlutik Oqartussat kisiartaallutik TELE-POSTimik piginneqataasuupput.

 

Sukumiinerusumik paasisaqarusukkuit apeqqutissaqaruilluunniit attaveqaqatigiinnermut pisortaq Julie Rademacher attavigiuk uunga: kommunikation@telepost.gl imaluunniit sianerlutit