Menu

Umiarsuaq kabelinik iluarsaassisussaq sapaatip akunnerata naanerani kujammukassaaq

15/03/2019 - 16:45

Sisimiut avannaani sikoqarnera pissutigalugu kabelinik iluarsaassinissaq ajornarallarpoq, tamannarpiarlu pissutigalugu umiarsuaq iluarsaassisussaq, Horizon Enabler, sapaatip akunnerata naanerani Nuummiit Qaqortup tungaanut ingerlassasoq.

Apeqqutaassaarlu kujataani silap qanoq innissaa. Pilersaarutit naapertorlugit ingerlasoqassappat iluarsaassineq marlunngorpat marsip 19-ani 2019-mi aallartinneqassaaq.

Iluarsaassineq aallartippat kujataani internettimut attaveqaatit tamarmik qaminneqassapput. (Paamiuniit Narsaq kujalleq ilanngullugu). Taamaakkaluartoq oqarasuaatit, mobilikkut attaveqaatit, sms-nik nassitsisinnaanerit, TV-mut radio-mullu attaveqaannassaaq.  Atuisulli attaveqaatit pitsaannginnerunissaat naatsorsuutigisariaqassavaat. Naatsorsuutigineqassaaq iluarsaassineq ullut 15-nit 20-llu missaannik sivisussussuseqassasoq. 

Imaaitgut kabelinik aaqqissuussinermi sakkortusaaviup attavia atorneqartussaavoq, taannalu attavia killeqartorujusuuvoq. Taammaammallu sullissinerput killeqartumik ingerlasariaqasaaq. 

Attaveqaatit killilimmik piginnaaneqarallarnissaasa nalaani inuiaqatigiinni sullissiviit inuussutissarsiorlunilu ingerlatsiviit naliginnaassumik sulisinnaanissaat pingaartinneqassaaq.

Atuisut akiliutaanik utertitsinissaq

Kujataani attaveqaatit matoqqanerisa nalaanni sullitavut internettimut akiliuteqassanngillat. Aningaasat utertoorutissat qanoq amerlatiginissaat kabelinik immap naqqatigoortunik iluarsaassineq naammassineqarpat aalajangerneqarumaarput. TELE-POST-ip sullitat e-mailii pigippagit, pineqartut toqqaannartumik ilisimatinneqarumaarput. Sullitavut TELE-POST-imut e-mailitik nalunaarutigisinnaavaat, taamaasilluni TELE-POST-ip atuisup e-malia pigilissamassuk.     

Iluarsaassinermi piffissaq atugassaq

Iluarsaassineq pilersaarutit naapertorlugit ingerlassappata kujataani kabeli immap naqqatigoortoq aprilip aallartinnerani iluarsisimanissaa naatsorsuutigineqarpoq. Sikullu pissusaa naapertorlugu umiarsuaq avanamukaqqissaaq, Sisimiut avannaani kabeli iluarsaakkiartorlugu.

 

Apeqqutissaqaruit attaveqaqatigiinnermut immikkoortortaqarfimmi sulisoq Paarnaq Hansen saaffigiuk, mail panah@telepost.gl imaluuniit oqarasuaatitigut +299 563376