Menu

Upernavik sukkanerusumik internetimut qaniluallak

10/08/2018 - 14:29

TELE-POST-ip Avannaani radioqarfinnik sakkortusaavinnik nutaanik sanaffigisaani qaqqat qaavini suli unamminartoqarpoq. Naak taamaakkaluartoq suleqatigisartakkat tamarmik ulappupput sanaartornerlu naammassiartorluarpoq.

TELE-POST aamma suleqatigisartagai aasaq manna ilungersorlutik suliniutinik annertuunik suliaqarput. Suliniutit annertuut ilagaat radioqarfiit Uummannamiit Upernavik tikillugu amerlinissaat, maannakkut radio, tv, internet aamma telefoneqarneq qaammataasat aqqutaatigut ingerlapput.

Suliniut siorna kinguaattoorpoq aasaanerani sivikitsumi annertuumik apisarsimammat.

Aasaq nillertoq
Ukioq manna TELE-POST suleqatigisartagut suleqatigalugit Uummannamiit Upernavimmut radioqarfinnik sakkortusaavinnik sisamanik sanalluni suliaq ingerlateqqippaa.

- Naak ukioq manna aammaarluta Uummannap aamma Upernaviup akornanni qaqqat qaavini pinngortitamit unamminartunik annertuunik naammattuuigaluarluta, taava sapinngisarput tamakkerlugu suliniutip 2018-imi naammassineqarnissaa ingerlapparput. Maannakkut sulisut amerlineqarput piffissani silap pitsaanerani suliassat ingerlanniarlugit, TELE-POST-imi Teknikkimut aamma IT-mut pisortaq Jonas Hasselriis oqaluttuarpoq.

Pujornera unamminartoqartitsivoq
Sulisut ilaat tamatuminnga suleqataasoq AK Montage sulineq pillugu imatut nassuiaassuteqarpoq.

- Ullut siulliit qulingiluat apummik nivalluta atorpagut, tassalu sulinerput aatsaat aallartissinnaalerlugu. Tamatuma saniatigut suliniummut unamminartoqarpoq ulluni 40-ni pujortarmat – juunimi aamma juulimiinnaq. Taamaattorli uagut suleqatigiiusugut nikallornata sulinerput ingerlapparput aamma inunnit inussiarnersunit Upernaviup eqqaamiuinit ikiorneqartarnermut qujamasuutigaarput.

Suleqatigiinneq iluatsitsinermik kinguneqarpoq
TELE-POST-imit neriuutigineqarpoq ukioq 2018 tassaassasoq Upernaviup qaammataasanit attaveqarnera peerneqassasoq. Suliap ingerlanneqarnissaanut Air Greenland assartuinermi pingaaruteqartuuvoq nunami taamak isorartutigisumiilluni.

- Nuannaarutigaarput sulinermut tapertaasinnaanerput helikopterigut atorlugit. Pingaaruteqartoq ataatsimoorluta Nunatsinni teknologii pitsanngorsarsinnaagatsigut, Air Greenlandip aningaasarsiornermut pisortaa Maliina Abelsen, oqarpoq.

- Qaammataasat aqqutigalugu attaveqarnermiit Upernavimmi nunaqarfinnilu radioqarfinnut sakkortusaavinnut nuunnerup sullittakkatsinnut malunnaateqarluartumik pitsanngoriaammik kinguneqassaaq, uagullu qilanaaraarput sumiiffinni innuttaasunut internet sukkanerusoq neqeroorutigisinnaalernissaa, Teknikkimut aamma IT-mut pisortaq Jonas Hasselriis, oqarpoq.