Menu

Upernavimmi nalliuttorsiualaarneq

20/10/2018 - 15:52

Arfininngorneq ulloq 20. oktober Upernavimmut nalliuttorsiorneruvoq angisooq. Sakkortusaavikkoorlugu attavimmut nutaamut atatillugu, nalunaaqutaq 12:00 TELE-POST-imit Upernavimmi saqqummiunneqarput Tusass internetimut periarfissiissutit ataatsimoortukkaat nutaat.

Internetimik atuisuuffiit nutaat saqqummiunneqarnerannut atatillugu Upernaviup timersortarfiani kaffillertoqarneranut, kaagillernermut aliikkusersuinermullu iseriartortut hundredit arlaqarput. Internetimut periarfissiissutit ataatsimoortukkaat assut nuannarineqarput,

- Nutaarsiassanut toqqaannartumik, utaqqinertaqanngitsumillu, isiginnaarsinnaanngornissarput qilanaarisimavarput. Netfliximik isiginnaartalernissara qilanaarisimavara. Aamma meeqqatsinnut periarfissaavoq nutaaq, neriuutigaarpullu meeqqat teknologiimik paasinninnissaannut annertusaataassasoq, innuttaasoq nuannaaqisoq, Nukajaraq Blytmann, oqarpoq.

Pisoq annertooq ammarneqarpoq TELE-POST-imi Teknikkimut IT-mullu pisortamit Jonas Hasselriisimit, kiisalu IT-mut pisortamit Emil Kleemannimit. Avannaata Kommuniani borgmesteri Palle Jerimiassen, Upernaviup attavittaarneranik Skype-kkut pilluaqqusivoq.

Malunnaatilimmik pitsanngortitsineq

Tallimanngormat unnukku nal. 20:00 sakkortusaavikkut attavik Upernavimmi ammarneqarpoq. Innuttaasunut tamanna nutaanik attaveqartitsilissaaq, internetip sukkassusaanit manna tikillugu ilisimaneqartumit sukkanerujussuarmik. Illoqarfik siornatigut qaammataasakkoorlugu angerlarsimaffinni annerpaamik 20 GB-t angullugit sukkassusilimmik attaveqarsimagaluartoq, maanna sakkortusaavikkut attaveqalerpoq killeqanngitsumik atuisinnaaffiulluni flatratemik attavimmik 10/2 Mbit angullugit sukkassusilimmik.

- Sumiiffimmi tamaani innuttaasunut internetimik sukkasuumik atugassaqartitsilernerput nuannaarutigaarput. Nunatsinni tamarmi attavinnik sapinngisamik pitsaanerpaamik qulakkeerinninnissarput anguniagaraarput. Upernavimmi pitsanngortitsinerit ilaatigut atuarfinnut, peqqinnissaqarfinnut aammalu illoqarfimmi allaffissornermik ingerlatsiviusunut allanut annertuumik iluaqutaalissapput, TELEPOST-ip pisortaanera Kristian Reinert Davidsen oqarpoq.