Menu

Upernavimmut sakkortusaavikkut attavik piareerpoq

16/10/2018 - 11:23

2020-p tungaanut siaartiterneqartuartussaq TELE-POST-ip attaveqaataa sakkortuneq sullitat amerlanerujartuinnartut nuannaarutigilersussaavaat. Tassunga ilaavoq Upernaviup tungaanut sakkortusaavikkut attavik maanna naammassineqangajalersoq.

Oktoberip naanerani Upernavik attavimmut sakkortusaavikkoortumut ullumikkut naluneqanngitsunit sukkanerungaartunut, taamaalillunilu aamma internetimut atuisuuffinnut nutaanut, attavinitsinneqassaaq.

2017-imi aggusti aallartiffiuvoq, Nuummiit Maniitsumut, Sisimiunut Aasiannullu Kitaata sineriaa atuarlugu Kalaallit Nunaannik imaatigut kabelimik 5.000 kilometerit missiliorlugit takitigisumik tallisitsinermik. Imaatigut kabelimik talliliineq sukkassutsimik aammalu sakkortusaaviup attaveqaataata pitsaassusaanik qaffatsiffiusinnaasimavoq.

Ukioq taanna Aasianniit Qasigiannguanut aammalu Ilulissanut sakkortusaaviup sakkortuninngortinnissaa TELE-POST-ip suliaralugu aallartippaa; Aasianniit Ilulissanut sakkortusaaviup piginnaasaatigut qaffatsillugu, Ilulissaniit Uummannamut aammalu Uummannamiit Upernavimmut sakkortusaavikkut attavik annertusaavigalugu.

- Internetikkut attaviup sukkasuup siammarneratigut Kalaallit Nunaanni ineriartornermut tapertaasinnaanerput tulluusimaarutigaarput. Attavilersuinermut aningaasaliisutut inissisimanerput, ukiuni makkunanerpiaq TELE-POST-ip suliaanut qitiulluinnartutut isigaarput, TELE-POST-imut siulersuisut siulittaasuat Stine Bosse oqarpoq.

Aamma borgmesterip Palle Jerimiassenip internetip sukkassusai sukkanerit qilanaarai,

- Upernavimmut aammalu Avannaata Kommunianut ulloq malunnassaqaaq. Sumiiffiup tamatuma tamarmi qaammataasap teknologiianik atuisariaarunnera, aammalu atugassarititaasut taakku maannakkut atorneqalissammata nuannaarutigaara, Avannaata Kommunianut borgmesteri oqarpoq.

2020-mut periusissiami anguniakkat naammassineqarnissaat qaninnerulerput

Sakkortusaavinnik suliaqarneq TELE-POST-ip 2020-mut periusissiaata ilagaa, tassani anguniarneqarma innuttaasut 92 procentiisa sukkasuumik interneteqalernissaat. Upernavimmut sakkortusaavikkut attaveqalernikkut 82 procentit sukkasuumik interneqartinneqalerput.

- Periusissiami anguniarneqartut maannangaaq taama qanitsigilereernerat nuannaarutigaarput. Tulluusimaarutigalugu oqaatigisinnaavarput nunatta tamarmi ataqatigiissinnissaanik anguniagarput annertuumik qaninnerulersimagipput, TELE-POST-ip pisortaanera Kristian Reinert Davidsen oqarpoq.

Sakkortusaavik maanna 2.000 kilometerit sinnerlugit takissuseqalerpoq aammalu sakkortusaavinnik stationeqarfeqarluni 52-inik. TELE-POST-ip sakkortusaavinnut stationeqarfii amerlasuut qaqqat qaavini 400-1.600 meterisut qatsitsigisuni sanaajupput.