Menu

TELE-POST-ip siulersuisuisa ulloq 17. februar 2015 ataatsimiinnerminni, ingerlatseqatigiiffiup tapersiissuteqartarneranut ilaasortaaffeqarneranullu politikki ataani allassimasoq akuersissutigaa. Politikki https://www.telepost.gl/tele-post-ip-tapersiissuteqartarneranut-ilaasortaaffeqarneranullu-politikki-ikkut saqqummiunneqarpoq.

TELE-POST-ip Kalaallit Nunaanni tamarmi nalunaarasuartaateqarneq allakkeriveqarnerlu ingerlataraa, inuiaqatigiillu pigisaraatigut. Taamaammat sulissinitta piginneqatitta naatsorsuutigisaannut soqutigisaannullu naleqqussartuarnissaa soqutigisarilluinnagaraarput. Taamaammat aamma tapersiissuteqartarnitsigut ilaasortaaffeqarnitsigullu suliniaqatigiiffiit aaqqissuussallu sorliit tapersiiffigisarnissaat peqqissaarulluinnagaraarput.

TELE-POST-ip suliniutinut sunut tapersiissuteqartarnerata ersarilluinnarnissaa qulakkeerumallugu, siulersuisut aalajangersinnaavaat qinnuteqartut aqqisa, sivisussutsip, aningaasat amerlassusaasa aammalu TELE-POST-ip tapersiiffigisassatut isumaqatigiissuteqarfigisimasaasa qanoq ittuunerisa aammalu ilaasortaaffigisat suunerisa tamanut saqqummiunneqarnissaat. TELE-POST-ip ukiumi tullermi tapersiissuteqarnissaanut ilaasortaaffigisaanullu atugassat missingersuutit annerpaaffilikkat, siulersuisut ukiut tamaasa akuersissutigisarpaat.

 

TELE-POST-imi tapersiissuteqarnissamut politikki

TELE-POST Kalaallit Nunaanni suliffeqarfiit annersat pingaarnersallu ilagaat, ingerlatseqatigiiffiullu inuiaqatigiinni akisussaaffeqarneranut ilaaginnarpoq – najukkani innuttaasunut, nunatsinnut tamarmut imaluunniit Kalaallit Nunaata nunani tamalaani isigineqarneranut aaqqissuussat ersarissumik iluaqutaajuartussamillu sunniuteqartussat tapersiiffiginissaat. Tapersiissutit aammattaaq ingerlatseqatigiiffiup nioqqutinik pilerisaaruteqarnerata nittarsaassineratalu ilaatut atorneqartarput, aatsaalli taamatut pisoqartarpoq aaqqissuussat tapersiiffigineqarsimasut ingerlatseqatigiiffiup tunngaviusumik naleqartitaanut pitsaasumik attuumassuteqaraangata.

Aaqqissuussat tapersiissuteqarfigisartakkagut pingaarnerpaat tassaapput, ingerlatseqatigiiffimmi paasissutissiinermut attaveqaqatigiinnermullu teknologiip atorneqartup imaluunniit allakkanik poortukkanillu pilertortumik eqaatsumillu nassiussinerit iluanni iluatsilluarfiunerpaat. Tapersiissutigineqartarput ingerlatseqatigiiffiup kiffartuussissutai sullississutaalu, tassa aningaasanngorlugit tapersiissutaanngitsut.

 

Aaqqissuussat tapersiissuteqarfigisartakkagut 

Qaffasinnerusumik ilinniagaqarneq inuiaqatigiit imminnut napatikkiartornerinut aqqummi naleqqat pingaarnerit ilagaat. Meeqqat inuusuttuaqqallu naleqassutsiminnik qaffasissumik pigisaqalernissaat aammalu ilinniarneq aqqutigalugu inuunerminni anguniakkaminnik naammassinninnissaat, aammalu angerlarsimaffimminninngaanniit inuiaqatigiinninngaanniillu tapersersorneqarnermik kajumissaarneqarnermillu pissarsiaqarnissaat, TELE-POST-ip peqataaffigiumavaa. Taamaammat meeqqanut ulorianartorsiortunut pilersaarutit, suliniutit ilinniarnissamut akornutaasunik annikillisitsisut kiisalu pilersitsiniarnerit attaveqaqatigiinnermut annertunerusumik isersinnaaneq aqqutigalugu peqatigiinnermik nukittorsaasut tapersiiffigisarpagut.

Inuiaqatigiinni ajornartorsiutit ikiorsiiffigeqataarusuppagut, ajunngitsortaasulli aamma puiussanngilagut: Isumalluarneq, nuannaarneq tulluusimaarnerlu kulturikkut misigisatigut kateritsitsiviusoq aammattaaq nukittorsarusupparput kiisalu timigissarnissamik peqqissuunissamillu soqutiginninnerulernissaq peqataaffigiumallutigu.

TELE-POST ingerlatseqatigiiffittut inuiaqatigiinnit pigineqartutut kinaassutsitsinnik annertuumik pingaartitsivoq, taamaattorli politikkikkut partiinik peqatigiiffinnillu tapersiissanani. Soorlumi aamma TELE-POST-ip inuit ataasiakkaat tunngaviatigut tapersiiffigineq ajorai. Tapersiissuteqarnitsigut imaluunniit ilaasortaaffeqarnitsigut aaqqissuussat avatitsinni ingerlanneqartussat uagut nammineq inuit pisinnaatitaaffiinik suliniuteqarnitsinnut, sulisut pisinnaatitaaffiinut, avatangiisimut ajortuliornissamullu akiuiniarnermut attuumassuteqartut tapersiiffigisinnaavagut.

TELE-POST-ip timersorneq aamma nunatsinnut tamarmut suliniaqatigiiffiit aqqutigalugit ajunngitsumik siunertallit tapersersorumaneruai, najukkani peqatigiiffiit pinnagit. Aningaasanik ikiorsiissutinik (stipendium) paasisassarsiorluniluunniit angalanissanut tapersiissuteqarneq ajorpugut. TELE-POST-ip niuernikkut ingerlatsiviisa iluanni ilinniartuunernut tapiissutit tapersiissutitut ingerlanneqarneq ajorput, Sulisoqarnermulli immikkoortoqarfimmi iliuusissanut pilersaarutip ilaatut ingerlanneqartarlutik.

Inuussutissarsiornikkut ineriartortitsineq Kalaallit Nunaata siunissami siuariartornissaanut pigissaaleriartornissaanullu pisariaqarluinnartuuvoq, tamannami aamma TELE-POST-ip niuernikkut ingerlatsiviisa pitsaasumik siuariartornissaannut pisariaqarpoq. Inuussutissarsiornermut tapersiissutinik tunniussineq ajorpugut, allanilli suleqateqarluta Kalaallit Nunaata nunani tamalaani tusaamaneqarnerata aammalu nunatsinni suliffeqarfiit unammillersinnaassusiisa, assersuutigalugu qarasaasiani sullissiviit digitaliseerikkat nassiussalerinermilu periarfissat aqqutigalugit, annertusarnissaanut nukittorsaaqataasinnaalluarpugut.

 

Qanoq iliornitsigut tapersiissuteqartarpugut 

TELE-POST tapersiissuteqartarpoq pingaartumik tapersiiffigisassamut sulisunik, nioqqutitsinnik aammalu ilisimasatsinni akeqanngitsumik tapersiuteqarnitsigut. Tapersiissutit aningaasaanngikkaluartut kroninut oorinullu naatsorsorneqartarput, taamaammat annertussusaat ersarittarpoq. Taamaammat aamma tapersiissuteqartarnitsigut anguniakkatsinnut tunngaatillugu tapersiissuteqarfigissallugit piukkunarnerpaasunik toqqaanissarput taamaalilluni sakkortusarneqarpoq. 

Sivisunerusumik aamma/imaluunniit annertunerusumik tapersiissuteqarfiit allaganngorlugu isumaqatigiissusiorfiusarput, sumut tapersiissuteqarnermik aammalu TELE-POST-ip tapiissutaasa qanoq annertutiginissaannik naatsorsuutigisaqarnermik ersarissaataasumik, tassungalu ilanngullugit tigusisussap tapersiivigineqarneranut sunik pisussaaffeqarneranik ersarissaasunik. Tapersiissutit ataavartumik ingerlasut minnerpaamik ukiumut ataasiarluni nalilersoqqinneqartarput.

 

Tapersiissutit annertussusaat 

Tapersiissutissatut qinnutigineqartut annertussusaat qinnuteqartup nassuiassavai. Telefoneqarnermut, internetimut sullississutinulluunniit allanut akilinnut qanoq atuitiginissamik naatsorsuuteqarneq allattorneqassaaq. TELE-POST tamanna tunngavigalugu tapersiiffigisatut atuinerit, tapersiissutip sivisussusaa, atuisuusussat kikkuunerisa akuerinissaat il.il. annerpaaffilersinnaavai.

TELE-POST-imut siulersuisut aatsaat akuersippata tapersiissuteqartoqarsinnaavoq 200.000 kr.-inik taakkuluunniit sinnerlugit amerlassusilinnut.

 

Ilaasortaaffeqarnernut politikki

Inuiaqatigiinni, suliffeqarfinni kiisalu nalunaarasuartaateqarnermik nassiussalerinermillu suliarfimmi ilisimasatsinnik sunniuteqarnitsinnillu sakkortusaaffiusinnaasunut soqutigisaqaqatigiinnut ilaasortaavugut. Ilaasortaaffeqarnerput aqqutigalugu aammattaaq aaqqissuussat avatitsinni ingerlanneqartussat uagut nammineq inuit pisinnaatitaaffiinik suliniuteqarnitsinnut, sulisut pisinnaatitaaffiinut, avatangiisimut ajortuliornissamullu akiuiniarnermut attuumassuteqartut tapersiiffigisinnaavagut.

TELE-POST peqatigiiffinnut oqallittarfinnullu tunngaviusumik naleqartitatsinnut tulluanngitsutut nalilerneqartunut, imaluunniit tusaamaneqarnitsinnik innarliisinnaasunut ilaasortaanngilaq. TELE-POST peqatigiiffinnut oqallittarfinnulluunniit toqqaannartumik toqqaannanngitsumilluunniit politikkikkut partiinut tapersersuisunut ilaasortaanngilaq.

Soqutigisaqaqatigiinnut politikkimik ingerlatalinnut ilaasortanngorneq aatsaat pisinnaavoq siulersuisut akuersinerisigut.

 

Nutarterisarneq akisussaaffeqarnerlu 

Ukiumut ataasiarlutik TELE-POST-ip siulersuisuisa tapersiissuteqartarnernut ilaasortaaffeqarnernullu ingerlatseqatigiiffiup politikkia nalilersoqqittarpaat.

Ingerlatseqatigiiffiup tapersiissutinik qinnuteqartunut attuumassutillit kiisalu peqatigiiffiit suleqatigiinnermullu oqallittarfiit TELE-POST-ip ilaasortaaffigisai, pisortaanerup ingerlatarai.